Kærunefnd útlendingamála: Meirihluti starfsmanna lætur af störfum vegna skertra fjárheimilda

Þrettán af nítján starfsmönnum kærunefndar útlendingamála munu láta af störfum í lok næsta mánaðar vegna skertra fjárheimilda nefndarinnar fyrir árið 2017.

Þetta kemur fram í yfirlýsingu frá formanni nefndarinnar, Hirti Braga Sverrissyni, og segir að starfsemi nefndarinnar muni við það dragast verulega saman.  Hjörtur Bragi segir að þeir sem láti af störfum séu tólf lögrfræðingar og einn ritari. Sjálfur mun hann halda áfram störfum.

„Samhliða fjölgun umsækjenda um alþjóðlega vernd undanfarin misseri hefur mikil aukning verið í fjölda mála sem borist hafa nefndinni. Til að bregðast við þessari fjölgun og ná markmiðum stjórnvalda um aukinn málshraða ákvað Alþingi árið 2016 að stækka kærunefndina og veita henni auknar fjárheimildir. Þrátt fyrir að ekki sé fyrirsjáanlegt að kærum til nefndarinnar fækki fékk nefndin í fjárlögum ársins 2017 aðeins um helming þeirra fjárheimilda sem hún taldi þörf á til að halda afgreiðslutíma mála áfram innan markmiða stjórnvalda um 90 daga meðalmálsmeðferðartíma.

Síðustu þrjá mánuði hefur meðalafgreiðslutími nefndarinnar á málum vegna umsókna um alþjóðlega vernd verið 76 dagar en var um 300 dagar þegar nefndin hóf störf fyrir tveimur árum. Við blasir að bið eftir niðurstöðu í þessum málum mun byrja að lengjast strax og starfsmönnum fækkar og verður í lok þessa árs, miðað við óbreyttar fjárheimildir, sambærileg við það sem þekktist áður en kærunefndin hóf störf.

Kærunefndin metur fjárþörf nefndarinnar umfram fjárlög ársins 2017 um 140 milljónir króna en ætla má að kostnaður vegna lengri dvalar umsækjenda um alþjóðlega vernd hér á landi á meðan þeir bíða niðurstöðu verði margföld sú upphæð á árinu. Hefur þá verið tekið tillit til þeirra sem koma frá öruggum upprunaríkjum og yfirgefa landið fljótlega eftir synjun hjá Útlendingastofnun. Vegna ákvæða í nýjum útlendingalögum um áhrif langs málsmeðferðartíma á niðurstöðu mála mun þessi bið í auknum mæli leiða til þess að umsækjendur um alþjóðlega vernd öðlist rétt til dvalar hér á landi. 

Í stefnuyfirlýsingu nýrrar ríkisstjórnarinnar er kveðið á um að afgreiðsla umsókna um alþjóðlega vernd verði mannúðlegri og afgreiðslutími verði styttur. Þrátt fyrir að kærunefndin hafi ítrekað vakið athygli á afleiðingum skertra fjárheimilda á starfssemi nefndarinnar og málsmeðferðartíma hefur vilji til að veita nefndinni aukafjármagn hefur ekki leitt til þess veitt sé vilyrði um auknar fjárheimildir,“ segir í yfirlýsingunni.

Sjálfstæð stjórnsýslunefnd

Kærunefnd útlendingamála er sjálfstæð stjórnsýslunefnd sem úrskurðar í málum sem til hennar eru kærð á grundvelli laga um útlendinga. Nefndin var hóf störf snemma árs 2015 og er hún skipuð sjö nefndarmönnum. Formaður og varaformaður eru í fullu starfi hjá nefndinni. Auk þeirra starfa hjá nú hjá nefndinni tveir yfirlögfræðingar, þrettán lögfræðingar og tveir ritarar.