Bílum sem skilað er til úrvinnslu fjölgar

Íslendingar eiga enn elsta bílaflotann af þeim löndum sem við berum okkur saman við, tæpum áratug eftir hrun. Aukning hefur orðið í nýskráningu bíla sem fluttir eru hingað til lands og er bílasala að nálgast það sem þekktist fyrir hrun.

Bílafloti Íslendinga er tekinn að yngjast aftur eftir hrun. Hlutfall bílaleigubíla á landinu árið 2005 var níu prósent en þetta hlutfall hefur hækkað í fimmtíu prósent á þessu ári. Nýskráðum fólksbílnum á landinu hefur fjölgað og eru þrettán þúsund og fimm hundruð það sem af er ári.

Framkvæmdastjóri Bílgreinasambandsins segir bílasölu nýrra bíla hafa verið í vexti þar sem ekki hafi verið vanþörf á.

„Þar sem að bílasala stoppaði strax eftir hrun og fór fyrst að taka við sér aftur árið 2014. Þannig að það var stórt gat á markaðnum,“ segir Özur Lárusson, framkvæmdastjóri Bílgreinasambandsins.

Árið eftir hrun voru nýskráningar bíla rétt rúmlega tvö þúsund en það sem af er þessu ári hafa um þrettánþúsund og fimm hundruð bílar verið nýskráðir.

„Við vitum öll hvað var að gerast í þjóðfélaginu árið 2009, það voru bara afleiðingar hrunsins og núna virðist vera ágætt ástand og það er þörf á nýjum bílum,“ segir Özur.

Betri hagsveifla og aukinn kaupmáttur fær einstaklinga og fyrirtæki til þess að endurnýja bílakostinn en aukinn fjöldi ferðamanna hefur sitt að segja um aukningu í bílaflota landsmanna en helmingur nýskráðra bíla það sem af er þessu ári eru bílaleigubílar. Özur segir Ísland en vera með of gamlan bílaflota og er meðal aldur skráðra bíla um síðustu áramót 12,5 ár.

„Það gerist  nú yfirleitt ekki hærra í þeim löndum sem við berum okkur jafnan við en við vonum að það fari nú aðeins að saxast á þá tölu núna,“ segir Özur.

Bílasala hefur aukist að undanförnu og komin á stað sem við þekktist fyrir hrun.

„Við erum að ná þeim toppi eins og það var þegar að best var árið 2005,“ segir Özur.

Úrvinnslusjóður sem greiðir út úrvinnslugjald þegar bílum er fargað hefur einnig séð breytingar á tölum hjá sér undanfarin misseri. Árið 2008 var met í fjölda þeirra bíla sem var skilað til úrvinnslu en þeir voru 8320. Þessi tala náði svo sögulegu lágmarki árið 2011 þegar einungis 2802 bílum var skilað. Þetta hefur hins vegar verið að snúast aftur við undanfarin misseri og ef fram sem horfir það sem af er þessu ári er líklegt að 8800 verði skilað og þar með sláum við enn eitt metið.