Dæmdur í tveggja ára fangelsi fyrir tilraun til nauðgunar: Varahéraðssaksóknari telur dóminn hafa mikla þýðingu

Kolbrún Benediktsdóttir, varahéraðssaksóknari, segir að fordæmi felist í dómi Hæstaréttar sem féll í dag en þá var maður sakfelldur fyrir tilraun til nauðgunar er hann hótaði 15 ára pilti að birta opinberlega viðkvæmt kynferðislegt myndefni sem pilturinn hafði sent manninum ef hann hefði ekki kynferðismök við manninn.

 

Tveir dómarar skiluðu sér atkvæði í málinu og töldu ekki rétt að sakfella fyrir manninn fyrir tilraun til nauðgunar en Kolbrún telur fordæmið engu að síður til staðar.

„Fordæmið felst í því að það er látið reyna á að sú háttsemi að nýta sér að hafa undir höndum viðkvæmt kynferðislegt myndefni til þess að fremja alvarlegra kynferðisbrot sé tilraun til að fremja nauðgun, eins og í þessu tilfelli. Á það er fallist og það held ég að muni hafa mikla þýðingu,“ segir Kolbrún í samtali við Vísi.

Sjá einnig: Hótaði að dreifa nektarmynd af fimmtán ára dreng

Hún segir að allajafna myndi það rýra fordæmisgildi að dómarar skili sératkvæði.

„En ef maður horfir á þann hluta fordæmisins sem snýr að því hvort þessi háttsemi sé tilraun til nauðgunar þá fæ ég ekki betur séð en að allir dómararnir séu sammála um það. Þeir eru hins vegar ósammála um hvort ákæruvaldinu hafi tekist að sanna að ásetningur stæði til þess að fullfremja  brotið,“ segir Kolbrún og bætir við:

„Mér finnst skipta mjög miklu máli upp á fordæmið að gera að dómstólar fallist á að þessi háttsemi, að verða sér út um viðkvæmt myndefni og nota það svo í því skyni að fá fram til að mynda kynferðismök, að það sé nauðgun. Ef það kemur svo síðar upp þar sem einhver sem hefur undir höndum viðkvæmt kynferðislegt efni og fær síðan þann sem er á myndinni til að hafa við sig samfarir þá getum við sagt með vísun í þennan dóm að það sé nauðgun.“