Kolbeinn skoraði í ævintýralegum bikarsigri

Nantes er komið í átta liða úrslit frönsku bikarkeppninnar eftir magnaðan 3-4 sigur á Bordeaux í framlengdum leik.

Nantes komst yfir strax á 6. mínútu leiksins með marki Yacine Bammou en Enzo Crivelli jafnaði fyrir Bordeaux fyrir hlé.

Snemma í síðari hálfleik kom Biyogo Poko Bordeaux yfir í leiknum en Kolbeinn jafnaði metin 24 mínútum fyrir leikslok.

Klaufaskapur í vörn Bordeuax gerði það að verkum að Nantes stal boltanum. Kolbeinn fékk sendingu fyrir og skoraði í tómt markið.

Þetta var síðasta markið í venjulegum leiktíma og því varð að framlengja leikinn.

Á áttundu mínútu framlengingar skoraði Malcom fyrir Bordeaux en Johan Audel jafnaði er sex mínútur voru eftir af framlengingunni. Kolbeinn var þá farinn af velli en hann yfirgaf völlinn á 102. mínútu.

Fjörið var þó ekki búið því Bedoya tryggði Nantes sigur með marki tveim mínútum fyrir lok framlengingarinnar.