Samstarfshópur skipaður um ástandið í Mývatni

Sigrún Magnúsdóttir umhverfisráðherra hefur skipað samstarfshóp sem ætlað er að taka saman lykilupplýsingar um ástand mála í Mývatni.

Landvernd skoraði nýlega á ríkisstjórnina að grípa til aðgerða vegna þeirrar stöðu sem upp er komin í vatninu. Lífríkið þar er sagt í bráðri hættu, meðal annars vegna frárennslismála og álags af mannavöldum. Kúluskíturinn er horfinn og hornsíla- og bleikjustofn vatnsins ekki svipur hjá sjón.

Samstarfshópurinn á að skila af sér fyrir 17. júní næstkomandi. Í tilkynningu frá ráðuneytinu segir að hann eigi að aðstoða stjórnvöld við ákvörðunartöku varðandi aðgerðir til að bæta úr þeim vanda sem lífríki vatnsins glímir nú við.