Oscar verður launahæsti leikmaður heims | Fær 160.000 pundum meira á viku en Suárez

Brasilíumaðurinn Oscar verður launahæsti leikmaður heims ef af félagaskiptum hans til kínverska liðsins Shanghai SIPG verður.

Talið er að Oscar færi sig um set frá Chelsea til Kína í janúar en Shanghai ætlar að borga 52 milljónir punda fyrir þennan 25 ára gamla miðjumann.

Samkvæmt frétt Daily Mail ætti Oscar að eiga fyrir salti í grautinn fræga ef hann fer til Shanghai. Félagið ku ætla að borga honum 400.000 pund á viku sem gerir hann að launahæsta leikmanni heims.

Cristiano Ronaldo og Lionel Messi eru launahæstu leikmenn heims en þeir fá 365.000 pund í vikulaun. Ef Oscar fer til Shanghai fær hann 35.000 pundum meira í vikulaun en þessir tveir bestu fótboltamenn heims.

Leikmenn fá vel borgað fyrir sína vinnu í Kína enda miklir peningar í umferð í fótboltanum þar í landi.

Shanghai virðist vera með sérlega djúpa vasa en í sumar keypti félagið brasilíska framherjann Hulk frá Zenit í Pétursborg á 46 milljónir punda.

Hulk er fjórði launahæsti leikmaður heims en Shanghai borgar honum 317.000 pund í vikulaun, 83.000 pundum minna en Oscar kemur til með að fá.

Athygli vekur að Oscar mun fá miklu hærri vikulaun en Luis Suárez, sem varð í 3. sæti í kjörinu um Gullboltann.

Suárez skrifaði í gær undir nýjan samning við Barcelona sem færir honum 240.000 pund í laun á viku. Úrúgvæinn, sem varð markakóngur Evrópu á síðasta tímabili, er ekki einu sinni á meðal 10 launahæstu leikmanna heims.

Oscar, sem kom til Chelsea frá Internacional í heimalandinu 2012, hefur ekki verið í byrjunarliði Chelsea í ensku úrvalsdeildinni frá því um miðjan september. Hann hefur alls leikið níu deildarleiki á tímabilinu en ekki tekist að skora.