Erfitt hvað umræðan er ljót og ömurleg

Á morgun ráðast örlög Bretlands innan Evrópu og hafa talsmenn úr báðum herbúðum verið á fleygiferð um landið allt í dag til að reyna að sannfæra þá sem enn hafa ekki gert upp hug sinn. Skoðanakannanir benda enn til hnífjafnrar úrslita, en veðbankar telja töluvert meiri líkur á því að landið verði um kyrrt í Evrópusambandinu.

Almenningur tekur þó enga sénsa og mynduðust biðraðir eftir því að kaupa erlendangjaldeyri, enda má búast við því að gengi pundsins falli ef niðurstaðan verður útganga.

Erfitt að fylgjast með umræðunni úr fjarlægð

Bretum búsettum erlendis finnst mörgum sárt að fylgjast með því úr fjarlægð hversu klofin þjóðin er. Einn þeirra er Matthew Deaves, sem hefur búið á Íslandi í tvö ár.

„Það hefur komið mér á óvart hversu ljót umræðan hefur verið og ömurleg, og það hefur verið stundum erfitt að fylgjast með því," segir Matthew sem sjálfur sendi inn sitt atkvæði fyrir löngu síðan og upplýsir að hann hafi kosið með málstað Remain hreyfingarinnar enda telji hann víst að bæði Bretland og Evrópusambandið verði sterkari saman.

„Það er krísa víða um Evrópu núna og Evrópa þarf okkur, þarf Bretland að halda áfram. Við höfum sterk áhrif og það er best fyrir Bretland og best fyrir Evrópu líka.“

Alls óvíst hvað gerist næst

Matthew segir mikla óvissu um afleiðingar af útgöngu úr ESB, bæði efnahagslega en einnig fyrir persónulega hagi margra Breta. Ekkert liggi fyrir um hvað muni gerast næst.

„Fyrir mig sem Breti sem býr fyrir utan Bretland, við höfum enga hugmynd um hvað muni gerast. Hvort íslenska ríkið ætli að sparka okkur út á föstudaginn, ég vona ekki, ogheld nú ekki,“ segir Matthew og hlær. „En við höfum ekki hugmynd um hvað mun gerast og það er stórt vandamál. Fyrir okkur persómulega, fyrir viðskipti og fyrir efnahagslíf Bretlands og líka ESB. Og ég held að við séum ekki tilbúin til að bregðast við því.“