Vilja banna ofurbónusa

Þingflokkur Samfylkingarinnar hefur lagt fram á Alþingi frumvarp til laga sem takmarkar bónusgreiðslur eignarhaldsfélaga gömlu bankanna.

Í frumvarpinu er lagt er til að umrædd félög falli undir ákvæði laga um fjármálafyrirtæki en samkvæmt lögunum eru fjárhæðir bónusgreiðslna takmarkaðar við 25% af árslaunum starfsmanna. Í greinargerð með frumvarpinu segir að engin rök standi til þess að undanskilja umrædd félög þeim reglum sem gilda um banka og eigendur þeirra.

Fyrsti flutningsmaður frumvarpsins er Helgi Hjörvar, þingflokksformaður Samfylkingarinnar. Í tilkynningu frá honum segir að greiðslur hárra bónusa í fjármálakerfinu fyrir hrun leiddu til mikils tjóns fyrir almenning og því ekki að ástæðulausu sem lögum var breytt til að takmarka slíka bónusa. 

Þá segir einnig að fyrirætlanir um greiðslur hárra bónusa til fámenns hóps starfsmanna eignarhaldsfélaga gömlu bankanna nú séu tímaskekkja.

Frumvarpið má lesa í heild sinni hér.