Innbrot í Fossvogi: Fengu sér Hnetutopp og fluttu svo fimm gítara í hjólbörum um hverfið

Óprúttnir aðilar brutust inn á heimili Ólafs Elíassonar tónlistarkennara í Fossvogshverfi í Reykjavík í gær. Fimm gítörum af dýrari gerðinni var stolið, fartölvum, hljómborði dóttur hans og ýmsu fleiru.

Ólafur segir að svo virðist sem að innbrotsþjófurinn eða þjófarnir hafi spennt upp bakdyrahurð á heimili fjölskyldunnar milli klukkan 12 og 14 í gær. „Þeir tóku þarna fimm gítara sem mér er mjög annt um. Svo tóku þeir tvær fartölvur, míkrófón, hljómborð dóttur minnar sem hún var lengi að safna sér fyrir og ýmislegt fleira.“

Hann segir lögreglumenn hafa komið á vettvang og tekið skýrslu vegna málsins og vonast til að mögulegt verði að hafa uppi á þýfinu, sérstaklega þar sem einn gítaranna sé auðþekkjanlegur og mjög sérstök útgáfa af Fender. „Lögregla sagði þó að þýfi sem þetta fari oft upp í einhvern gám og hverfi út landi. Ég vil þó trúa því að þetta finnist.“

Hjólbörurnar fundust í matjurtargörðum skammt frá

Ólafur segir að þegar fjölskyldan hafi farið að skoða aðstæður úti í garði sínum hafi komið í ljós að hjólbörurnar voru á bak og burt. „Þær fundust svo í matjurtagörðum um hundrað metrum frá húsinu,“ segir Ólafur sem býr í Grundarlandi.

„Þeir hafa þá ferjað hljóðfærin og tölvurnar í hjólbörunum, komið þessu eitthvað áleiðis frá húsinu og á brott. Það bara hlýtur einhver að hafa séð þessa menn vera að ferja þýfið þessa leið.“

Fengu sér ís

Ólafur segir að þegar dóttir hans hafi komið heim um miðjan dag í gær og séð að brotist hafi verið inn, þá hafi frystirinn einnig staðið opinn. „Þeir hafa fengið sér toppís. Ég mundi að það var einn Hnetutoppur eftir í frystinum og við sáum leifarnar af bréfunum úti í garði.“

Hann segist hafa safnað gítörunum sem stolið var á síðustu árum. „Ég er með mikið unglingastarf og hef haft gaman af því að láta krakkana nota hljóðfærin mín sem eru af hæsta gæðaflokki. Þetta eru Fender og Gibson gítarar í dýrari kantinum, hljóðfæri sem hafa fylgt starfi mínu lengi og ég sé mjög mikið á eftir. Mest sé ég eftir Fender Custom Shop gítar sem hefur verið notaður í mikið af unglingaverkefnum,“ segir Ólafur.