Hugnast ekki aðkoma einkaaðila að flugvellinum

Meirihluti fjárlaganefndar Alþingis leggur til í nefndaráliti sínu við fjármálaáætlun ríkisstjórnarinnar að einkaaðilar komi í auknum mæli að uppbyggingu og rekstri Keflavíkurflugvallar.

Í Viðskiptahluta Morgunblaðsins, ViðskiptaMogganum, í morgun greinir Guðlaugur Þór Þórðarson, varaformaður fjárlaganefndar Alþingis, frá nefndaráliti meirihlutans.Á næstu árum er gert ráð fyrir að fram­kvæmdir við Kefla­vík­ur­flug­völl muni kosta á bil­inu 70 til 90 millj­arða króna og að flugvöllurinn eigi að geta tekið á móti allt að 14 milljónum farþega.

Meirihlutinn telur það umhugsunarvert að á síð­ustu sex árum hefur þeim flug­völlum í Evr­ópu sem eru í bland­aðri eigu ríkis og einka­að­ila eða alfarið í eigu eink­að­ila fjölgað hlut­falls­lega úr 23% í 55%. Nú fara 80% flug­far­þega til og frá Evr­ópu og innan Evr­ópu um slíka flug­velli.

Guðlaugur segir í samtali við ViðskiptaMoggann að uppbygging á flugvellinum sé nauðsynleg en þar sem hann er rekinn af hinu opinbera þá fylgi slík uppbygging mikil áhætta.

Oddný Harðardóttir, formaður Samfylkingarinnar, gefur lítið fyrir hugmyndir um aðkomu einkaaðila að flugvellinum.

„Mér lýst nú ekkert vel á þær vangaveltur,“ segir hún. „Í fyrsta lagi vegna þess að innviðauppbygging Keflavíkurflugvallar er fjármögnuð með rekstri flugstöðvarinnar. Það eru engir peningar teknir úr öðrum verkefnum og færðir til flugvallarins. Þegar að uppbyggingunni er svo lokið fer reksturinn að skila arði í ríkissjóð. Það má ekki skilja það svo að það sé verið að taka peninga úr ríkissjóð til að byggja upp á Keflavíkurflugvelli,“ segir hún.

„Síðan er Keflavíkurflugvöllur okkur mjög mikilvægur, ekki bara af því að við erum eyja, heldur líka af öryggisástæðum og sem gátt á milli landa og tenging á milli þeirra. Ég vill ekki setja þennan mikilvæga part af samgöngukerfi okkar í hendurnar á einkaaðilum. Opinberir aðilar eiga að reka flugvöllinn sem gegnir mikilvægu hlutverki fyrir okkur sem samfélag,“ segir Oddný.