Innbrot og líkamsárásir

Erill var hjá lögreglu á höfuðborgarsvæðinu í gærkvöldi og í nótt. Um kvöldmatarleytið í gærkvöldi var tilkynnt um innbrot í geymslu þar sem búið var að stela veiðistöngum og öðrum búnaði tengdum slíkum veiðum.

Skömmu síðar var tilkynnt um innbrot í bifreið en ekki var vitað hverju var stolið. Á níunda tímanum í gærkvöldi var síðan tilkynnt um þjófnað úr hótelherbergi. Um klukkan ellefu í gærkvöldi var síðan tilkynnt um innbrot í sameign í fjölbýlishúsi og þaðan stolið reiðhjólum, en í öllum tilvikum er gerandi ókunnugur að því er fram kemur í dagbók lögreglu.

Tvær líkamsárásir voru tilkynntar í gærkvöldi. Önnur á tíunda tímanum og hin þegar klukkan var sex mínútur gengin í ellefu í gærkvöldi. Í báðum tilvikum var um minniháttar meiðsl að ræða en aðeins vitað í öðru tilviki hver gerandinn er.