Áttföldun á útlánum lífeyrissjóðanna

Útlán Lífeyrrissjóða á húsnæðismarkaði hér á landi hafa áttfaldast á einu ári. Dósent í hagfræði segir þetta lýsa bættu ástandi á fasteignamarkaði og að þessi þróun sé til góða fyrir íslenska neytendur.

Í október í fyrra tók Lífeyrissjóður Verzlunarmanna þá ákvörðun að hækka veðhlutfall íbúðalána í 75% og lækkaði vexti við sama tilefni á þann hátt að kjör sjóðsins voru nokkuð hagstæðari en viðskiptabankanna. Fleiri lífeyrissjóðir fylgdu í kjölfarið og síðan þá hafa útlánin aukist hratt.



Flestir velja verðtryggð lán.

Fyrstu sex mánuði ársins lánuðu lífeyrissjóðirnir 38,4 milljarða í húsnæðislán með útgáfu tæplega 2500 skuldabréfa. Tæplega 74% lánanna voru verðtryggð lán og rúmlega 26% óverðtryggð. Umsvif lífeyrissjóðanna á húsnæðislánamarkaði hefur því tæplega áttfaldast frá því í fyrra. Frá þessu var fyrst greint Kjarnanum.

Ásgeir Jónsson, dósent í hagfræði segir jákvætt að lífeyrissjóðirnir hafi komið inn af auknum krafti á markaðinn í fyrra.

„Lífeyrissjóðirnir hafa alltaf fjármagnað húsnæðislán á Íslandi. Spurning hvort þeir geri það beint eða óbeint. Eins og þeir gerðu áður kaupi útgáfur Íbúðalánasjóðs eða bankanna. Það má segja að það sé í rauninni bara jákvætt að þeir hafi komið sterkir inn á markaðinn og í rauninni einhverju leiti brugðist við vöntun á fjármagni sem þarna var til staðar.“

Hann segir ástæðu vinsælda lífeyrissjóðanna þegar kemur að húsnæðislánum skýrast af betri kjörum og aukinni uppsveiflu á fasteignamarkaði.

„Þetta lýsir meira en nokkuð annað, bættu ástandi á fasteignamarkaði. Aukinni eftirspurn. Lífeyrissjóðarnir hafa í sjálfu sér alltaf lánað út til sinna sjóðsfélaga en spurning hversu mikil eftirspurn er eftir því.“



Gætu minnkað umsvifin.

Í ljósi aukinnar hlutdeildar á húsnæðislánamarkaðnum sé ekki ólíklegt að lífeyrissjóðirnir minnki umsvif sín í húsnæðislánum næstu mánuðum.

„Það kæmi ekki á óvart ef þeir fara aðeins að hægja á sér í þessu.“