Lífið

Beckham ánægður með íslenskan aðdáendaklúbb Alberts Morgan

Birgir Örn Steinarsson skrifar
Börn Beckham hjónanna fóru ekki með ofan í gíginn í hádeginu í dag.
Börn Beckham hjónanna fóru ekki með ofan í gíginn í hádeginu í dag. Vísir/Friðrik Þór

Söngkonan Sigríður Thorlacius og Guðmundur Óskar bassaleikari Hjaltalín fóru niður í Þríhnjúkagíg um hádegisbilið í dag og léku nokkur lög fyrir David og Victoriu Beckham. Guðmundur lék á gítar á meðan Sigríður söng. Með Beckham hjónunum voru Björgólfur Thor og Katrín eiginkona hans.

„Við vorum bara fengin til þess að koma og spila ofan í gígnum,“ segir Guðmundur Óskar sem af virðingu við Beckham hjónin vill ekki gefa upp hvaða lög þau voru beðin um að spila. „Við höfum gert þetta áður. Stundum er fólk að fara þarna niður og stundum er hópar sem biðja um tónlistaratriði.“

Guðmundur Óskar deildi í sakleysi sínu mynd af sér með Beckham á Facebook í dag enda mikill aðdáandi Manchester United. Honum til lítillar skemmtunar hefur síminn varla stoppað frá fjölmiðlum.

„Þetta er með þeim skrítnari uppákomum sem ég hef tekið þátt í en ég vill ekki vera að slúðra neinu persónulegu um þeirra mál. Ég vil ekki vera gæinn sem spilaði ofan í Þríhnjúkagíg með Beckham og fór svo beint í fjölmiðla með slúðrið."

Guðmundur fékk að láta taka mynd af sér með Beckham og deildi á Instagram og Fésbók. Vísir/einkasafn

Í aðdáendaklúbbi Alberts Morgan
Guðmundur viðurkennir þó að þetta hafi verið sérstök upplifun fyrir sig þar sem hann er mikill fótboltaunnandi og hefur alla tíð stutt Manchester United. Það var honum sérstök ánægja að hitta gamla goðið sitt á þessum degi, því í dag eru 25 ár síðan Beckham gekk til liðs við MU.

"Hann var virkilega viðkunnanlegur. Ég vissi af dagsetningunni því ég er í klúbbi sem var stofnaður til heiðurs Alberts Morgan. Það var gaur sem vann í krúinu hjá Alex Ferguson sem var með eitthvað órætt hlutverk. Hann virtist hafa það eina hlutverk að vera góður vinur allra og við skýrðum klúbbinn því eftir honum. Fáir vita hver hann er þrátt fyrir að hafa verið mikilvægur hlekkur í MU keðjunni. Beckham fannst mikið til þess koma að við skyldum vera með klúbb hér á Íslandi í hans nafni.“

Guðmundur segist ekkert hafa talað við hann um árangur íslenska karla landsliðsins í fótbolta. Líklegast var það skynsamlegt af honum þar sem það gæti verið viðkvæmt umræðuefni við fyrrverandi fyrirliða Englands sem Ísland sló út í 16-liða úrslitum.

Nokkuð um tónlistarflutning í gígnum
Töluverð tíska hefur verið fyrir því að halda tónleika ofan í hellinum en á Secret Solstice hátíðinni spiluðu þar Chino Morino söngvari bandarísku hljómsveitarinnar Deftones og Snorri Helgason.

Í fyrra fóru strákarnir í Kaleo niður holuna og fluttu þar órafmagnaða útgáfu af lagi sínu Way Down We Go. Myndbandið af þeim flutningi hefur fengið um 3,5 milljón spilanir á Youtube.

Varað hefur verið við því að framkalla of mikinn hávaða inn í hellinum vegna hættu á grjóthruni og þess vegna þurfa allir þeir sem fara niður að vera með tilheyrandi hjálma. Einnig er það ástæðan fyrir því að tónleikar eru oftast órafmagnaðir þegar farið er niður.

Að neðan má sjá myndasyrpu frá komu Beckham hjónanna til Íslands í gærkvöldi. Friðrik Þór Halldórsson tók myndirnar.

Guðmundur Óskar spilaði fyrir David Beckham í þríhnúkagíg.

Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.