Byggja rúmlega þrettán þúsund fermetra flugskýli á Keflavíkurflugvelli

Icelandair stendur í framkvæmdum en í dag var tekin fyrsta skóflustungan að nýju flugskýli fyrirtækisins á Keflavíkurflugvelli. Þetta kemur fram í tilkynningu.

Flugskýlið er 13.600 fermetra viðbygging við núverandi flugskýli fyrirtækisins sem er orðið tveggja áratuga gamalt. Gert er ráð fyrir því að skýlið verði tekið í notkun seint á næsta ári. Það mun hýsa meðal annars lager, verkstæði, skrifstofur og mötuneyti.

„Við hönnun flugskýlisins hefur verið horft til umhverfisþátta í efnisvali auk þess sem gott vinnuumhverfi starfsfólks hefur verið haft að leiðarljósi. Má þar til dæmis nefna val á steinull til einangrunar, innlenda framleiðslu samlokueininga, notkun vatnshitapanela til upphitunar og LED lampa í lýsingu. THG arkitektar og verkfræðistofan Ferill hafa hannað bygginguna,“ segir í tilkynningunni.

Þá kemur fram að húsið verði um 27 metra hátt og að á suðurhlið skýlisins verði rúmlega 18 metra á flugvélahurð sem samanstendur af átta flekum á brautum. 

„Vöxtur Icelandair hefur gert það að verkum að það rými sem félagið hefur til viðhalds á Keflavíkurflugvelli annar ekki þörf félagsins fyrir viðhaldsskoðanir og breytingar á flugvélum og hefur félagið þurft að senda vélar erlendis í auknum mæli í slík verkefni. Veturinn 2015-2016 voru t.a.m. 14 stór viðhaldsverkefni send erlendis og keypt viðhaldsvinna sem nemur um 150 þúsund vinnustundum eða 75 ársverkum. Með byggingu skýlisins markar Icelandair þá stefnu að sinna sem mestu af viðhaldi flugflota síns á Íslandi.“ 

Með byggingu flugskýlisins skapar Icelandair jafnframt 200 störf. 

„Icelandair hefur stutt við bakið á uppbyggingu flugvirkjanáms á Íslandi og þannig tryggt aðgang að sérmenntuðum starfskröftum sem sinnt geta þeim störfum sem verða til í skýlinu en auk flugvirkjastarfa skapast störf fyrir aðra iðnaðarmenn, verkamenn og skrifstofufólk svo heildarfjöldi starfa sem skapast með framkvæmdinni er á annað hundrað. Nú starfa um 300 manns í flugskýli Icelandai,“ segir í tilkynningu.