Rannsókn íslenskra vísindamanna vekur heimsathygli

Hægt er að binda koltvísýring sem steintegund í basaltberlögunum við Hellisheiðarvirkjun að 95 prósentum á tveimur árum en ekki öldum eða árþúsundum eins og áður var talið. Þetta kemur fram í grein sem mun birtast á morgun í Science, einu virtasta og þekktasta vísindatímariti heims. Í greininni er fjallað um CarbFix loftlagsverkefnið sem unnið hefur verið að við virkjun Orku náttúrunnar á Hellisheiði frá árinu 2007.

Höfundar greinarinnar, sem ber heitið Rapid carbon mineralization for permanent disposal of anthropogenic carbon dioxide emission, eru úr rannsóknarhópi sem vinnur að bindingu koltvíoxíðs í basalti. Meðlimir hópsins eru m.a. frá Háskóla Íslands, Orkuveitu Reykjavíkur, ÍSOR, Columbia University í New York, CNRS í Toulouse, University of Southampton, University College í London og Kaupmannahafnarháskóla. Juerg Matter frá University of Southampton leiðir þann hluta rannsóknanna sem greinin fjallar um.

„Þessar niðurstöður eru merkilegar fyrir margra hluta sakir. Í fyrsta lagi hvað bindingin er hröð. Aðferðirnar sem við höfum þróað standa öðrum tilraunum í þessa veru talsvert framar hvað þetta varðar. Í öðru lagi er þessi aðferð miklu ódýrari en aðrar sem við höfum upplýsingar um. Við áætlum að kostnaður við bindingu hvers tonns sé um 3.500 krónur. Það helmingur til fjórðungur af þeim fjárhæðum sem gefnar hafa verið upp við samsvarandi verkefni. Í þriðja lagi höfum við nú í höndunum niðurstöður sem gefa til kynna að heimsbyggðin hafi eignast nýtt vopn í baráttunni við loftslagsvandann,“ segir Edda Sif Pind Aradóttir verkefnisstjóri.

Málið hefur vakið gífurlega athygli erlendis en margir af stærstu miðlum heimsins hafa fjallað um það. Þar á meðal má nefna New York Times, New Scientist, Wired, The Guardian og WashingtonPost. Í greinunum er hins vegar tekið fram að basl gæti verið að leika þetta eftir á erlendri grund enda ekki önnur lönd ekki jafnrík af basalti og Ísland.