Gekk um götur Berlínar í karakter

Þetta var mikið ævintýri,“ segir Tómas Lemarquis leikari um hlutverk sitt í nýjustu X-Men myndinni. Í henni leika margir heimsþekktir leikarar og má þar nefna t.d. Jennifer Lawrence, Mich­ael Fassbender, Oliviu Munn, Sophie Turner og Oscar Isaac.

„Ég var í senu með Jennifer Lawr­ence og Oscar Isaac – það var alveg ótrúlegt. En þegar maður er kominn í karakter, þá er þetta bara karakter við karakter, þá er þetta ekkert lengur Jennifer og Tómas. Þá er maður bara kominn í annan heim.

Karakterinn heitir Caliban, hann er yfirmaður Morlocka sem eru stökkbreyttar neðanjarðarverur. Hann er kærasti Psylocke sem er leikin af Oliviu Munn. Hans karakter er á gráu svæði – hvorki vondur né góður, hann er algjör tækifærissinni. Hann er mjór albínóasláni. Þetta er annars ekki nema í þriðja skiptið sem albínóanafnið tengist mér. Albínóafélagið verður örugglega brjálað því að ég er enginn albínói.

Ég er með umboðsmann í LA sem reddaði þessu, ég sendi prufu á hann þegar ég var í Berlín og síðan var ég bara ráðinn. Fyrir tveimur árum datt ég inn í bíó á meðan ég var að taka upp tónlistarvídeó í Póllandi. Ég var bara einn í verslunarmiðstöð og ákvað að sjá einhverja mynd. Ég fór þá á síðustu X-Men myndina, Days of Future Past, ég fílaði hana ótrúlega vel og hugsaði: „Mig langar til að leika í þessari mynd og á móti Jennifer Lawrence.“ Ári síðar er ég kominn akkúrat í þau spor, sem er svolítið súrrealískt,“ segir Tómas aðspurður hvernig hann hafi dottið inn á þetta hlutverk. En hvernig fer svo undirbúningur fyrir svona hlutverk fram?

„Í svona mynd er það svolítið sérstakt, að maður fær bara að sjá sína senu en ekki allt handritið – þetta er svo leynilegt allt saman. Það þarf svolítið að finna sínar leiðir til að finna upplýsingar, fara í myndasögubækurnar sjálfar t.d. – maður fer í svolitla rannsóknarvinnu náttúrulega sem leikari. En fyrir mig sæki ég rosalega mikið í búninga – þetta byrjar allt með búningunum fyrir mig. Bæði búningunum og skónum. Ég var sendur tvisvar til London að máta búninga og föt. Svo er ég oft í fötunum í einhverja daga; fer út að labba í fötunum og læt karakterinn koma til mín svona smátt og smátt, t.d. í gegnum göngulagið. Ég var svo heppinn að ég fékk fötin send til mín til Berlínar og fékk að vera svolítið í þeim og þannig kom hann Caliban til mín.

Ég er í miðjum tökum á mynd sem heitir Touch Me Not og leikstýrt af rúmenskum leikstjóra. Ég er búinn að taka upp helminginn af myndinni og fer núna í byrjun júní að taka upp seinni hlutann í Leipzig. Þessi mynd er að stórum hluta impróvíseruð og er akkúrat hinum megin á skalanum við X-Men, er lítil indí-mynd,“ segir Tómas aðspurður hvað sé fram undan hjá honum, „Síðan vona ég að aðdáendur taki Caliban vel svo að hann fái að koma aftur í næstu X-Men myndum. Leikstjórinn og framleiðandinn voru allavegana ánægðir.“