Teflir í 30 klukkutíma og styrkir börn í neyð

Hrafn Jökulsson, rithöfundur og skákfrömuður, mun í dag og á morgun laugardag tefla skákmaraþon í Ráðhúsi Reykjavíkur og safna framlögum og áheitum, sem renna óskert til Fatimusjóðs og UNICEF í þágu sýrlenskra flóttabarna í neyð.

Alls teflir Hrafn í 30 klukkustundir, en skemmtikraftar og listamenn troða upp á meðan maraþoninu stendur. Hrafn teflir frá klukkan níu að morgni til miðnættis báða dagana og hvetur alla til að koma og taka eina bröndótta til styrktar þessu góða málefni. Skákkunnátta er algert aukaatriði, að sögn Hrafns.

Það eru Hrókurinn og Skákakademía Reykjavíkur, sem standa að viðburðinum í samvinnu við Fatimusjóðinn og UNICEF.

Á síðasta ári tefldi Hrafn maraþon með svipuðu sniði í Hörpu. Maraþonið þá var hluti af landssöfnun Fatimusjóðs og UNICEF, sem alls skilaði 20 milljón króna framlagi í þágu sýrlenskra barna í flóttamannabúðum. Þar af skilaði maraþon Hrafns hátt í tveimur milljónum króna, og vonast hann til að gera enn betur núna. Öll framlög renna óskert í söfnunina, enda fer ekki króna í kostnað og vaskur hópur gefur vinnu sína.

Margir hafa þegar boðað komu sína í Ráðhúsið, og segir Hrafn að það sé sannkallaður þverskurður þjóðarinnar. „Fólk á öllum aldri og úr öllum áttum hefur tekið áskorun minni í þágu málstaðarins. Þarna verða bæði skákmeistarar og byrjendur, listamenn og forsetaframbjóðendur. Þarna mæta jafnt leikskólabörn og eldri borgarar, en elsti áskorandinn er Kristín Anna Eggertsdóttir Claessen, sem verður níræð síðar á árinu og hún mætti líka í Hörpuna í fyrra."

Þetta er fimmta skákmaraþonið sem Hrafn og Hrókurinn standa fyrir. Mest hefur hann teflt 250 skákir á 36 klukkustundum í þágu grænlenskra barna.

„Þetta var ótrúlega skemmtilegt og tíminn leið hratt“, segir Hrafn um skákmaraþonið í Hörpunni í fyrra. „Það komu vissulega tímabil, þegar mest gekk á, sem mig var farið að sundla, en stemmningin var frábær og fyllti mig orku. Skák er náttúrlega svo skemmtileg, þannig að það eru forréttindi að geta teflt við fólk úr öllum áttum og látið gott af sér leiða," segir Hrafn. 

Fréttin birtist fyrst í Fréttablaðinu 6. maí