Óhefðbundin loðnuvertíð skilar um nítján milljörðum króna

Reiknað er með að nýafstaðin loðnuvertíð geti skilað um nítján milljörðum í útflutningsverðmætum sem er mun minna en vertíðin á undan skilaði. Íslensk skip veiddu aðeins um 100 þúsund tonn en erlend skip 73 þúsund tonn.

Þetta kemur fram á heimasíðu Síldarvinnslunnar í Neskaupstað. Þar segir að vegna takmarkaðra aflaheimilda hófu íslensk skip veiðar seint eða um það leyti sem Japansfrysting og hrognavinnsla gat hafist. Það voru hins vegar erlend skip sem lögðu stund á veiðarnar á fyrri hluta vertíðarinnar en mörg þeirra lönduðu afla sínum hér á landi. Var það mikilvæg búbót fyrir íslensku vinnslufyrirtækin, segir í fréttinni.

Alls var úthlutað 390 þúsund tonnum til íslenskra skipa á vertíðinni 2015 og var gert ráð fyrir að verðmæti loðnunnar á þeirri vertíð næmu 27 milljörðum króna. Á vertíðinni 2014 var einungis úthlutað rúmlega 127 þúsund tonnum til íslenskra loðnuskipa, og eru vertíðirnar þrjár á síðustu árum til marks um hve sveiflukenndar loðnuvertíðir síðustu ára hafa verið.

Alls tók Síldarvinnslan á móti 43.368 tonnum af loðnu á vertíðinni þegar sjófryst loðna er meðtalin. Eru það mikil viðbrigði frá vertíðinni 2015 þegar fyrirtækið tók á móti 138.230 tonnum, en á vertíðinni 2014 var móttekið hráefni hins vegar um 45 þúsund tonn.

Öll loðna var veidd til manneldisvinnslu á vertíðinni en nútíma fiskiðjuver sem framleiða frysta loðnu og loðnuhrogn til manneldis afkasta álíka miklu og öflugar fiskimjölsverksmiðjur gerðu fyrir nokkrum árum. Er þessi breyting á nýtingu loðnunnar gott dæmi um þá þróun sem átt hefur sér stað í íslenskum sjávarútvegi, er bent á í fréttinni.