Eftir hlýindi undanfarna daga má búast við að það kólni verulega um helgina. Búast má við að vindur snúist í svala norðanátt í nótt með lítils háttar rigningu norðan- og vestanlands eða jafnvel snjókomu til landsins.

Þetta er þó helst bundið við Norður- og Austurland á morgun en áfram verður hlýtt suðvestanlands. Á föstudag mun hins vegar kólna á landinu öllu og má búast við svölu veðri um og eftir helgina með rigningu eða jafnvel slyddu.

Veðurhorfur á landinu næstu daga:

Á fimmtudag:
Norðlæg átt 5-10 m/s og bjartviðri, en 10-15 og skýjað með austurströndinni. Hiti frá frostmarki norðaustantil, upp í 10 stig sunnanlands. Frystir víða á landinu um kvöldið.

Á föstudag:
Breytileg átt 3-8, en norðan 8-13 austast fram eftir degi. Þurrt á landinu og skýjað með köflum. Hiti um og undir frostmarki austantil, annars hiti 2 til 7 stig.

Á laugardag:
Suðvestan 3-8 og skýjað, en bjartviðri á Austurlandi. Hiti 1 til 7 stig.

Á sunnudag:
Vestlæg átt. Dálítil rigning eða jafnvel slydda um landið vestanvert og með norðurströndinni, en þurrt suðaustan- og austanlands. Hiti 2 til 7 stig.

Á mánudag:
Útlit fyrir norðanátt með dálítilli snjókomu og vægu frosti norðantil á landinu, en bjartviðri sunnantil og hiti að 7 stigum yfir daginn.

Á þriðjudag:
Líkur á suðvestanátt með skýjuðu veðri vestanlands, en bjart annars staðar. Hlýnandi veður.