40% kvenna í Kvennaathvarfinu með sjálfsvígshugsanir

Yfir 40 prósent þeirra kvenna sem leituðu til Kvennaathvarsins á liðnu ári höfðu verið með sjálfsvígshugsanir áður en þær komu þangað. Rúm tuttugu prósent kvennanna sem komu í athvarfið kærðu ofbeldið sem þær höfðu orðið fyrir til lögreglu en það hlutfall hefur aldrei verið hærra.

Þetta er á meðal þess sem fram kemur í ársskýrslu Samtaka um Kvennaathvarf sem kom út í dag, en allnokkur aukning var í aðsókn í Kvennaathvarf á árinu 2015 frá fyrra ári. 846 komur voru skráðar á árinu, 720 í viðtöl og 126 í dvöl.

„Það var mikil að sókn hjá okkur á árinu og í rauninni bara einu sinni sem að fleiri konur komu til okkar, annað hvort í dvöl eða viðtöl,“ segir Sigþrúður Guðmundsdóttir framkvæmdastýra samtaka um Kvennaathvarf.

Ástand kvennanna þegar þær koma í athvarfið er misjafnt en mikill meirihlutiþeirra hefur þjáðst af margskonar andlegum og líkamlegum kvillum vikurnar á undan.

„Það sem er kannski einna mest sláandi er að fjörtíu prósent kvennanna hafa haft ítrekaðar sjálfsvígshugsanir vikurnar fyrir komu,“ segir Sigþrúður.

Fleiri konur kærðu ofbeldismenn sína en áður hefur sést, eða um 20 prósent. Sigþrúður segir það ánægjulega þróun sem meðal annars sé að þakka átaki lögreglunnar um heimilisofbeldi.

„Það mjakast örlítið upp á við hlutfall kvennanna sem leggja fram kæru vegna ofbeldisins. Þær eru þó ennþá í miklum minnihluta. Við teljum að þetta séu góðar fréttir, ekki síst í ljósi þess að þetta bendir til aukins trausts í garð lögreglu, og bættra vinnubragða lögreglu víða um land. Þannig að konur fá betri þjónustu, vinnubrögðin á vettvangi virðast vera markvissari og traustið í garð lögreglu ívið meira.“