Innanríkisráðherra hefur áfrýjað dómi um Reykjavíkurflugvöll

Innanríkisráðherra hefur áfrýjað dómi Héraðsdóms Reykjavíkur um að ríkinu sé skylt að loka Norðaustur-suðvestur flugbrautinni á Reykjavíkurflugvelli. Borgarstjóri segir mikla hagsmuni undir í málinu og vonast til að niðurstaða Hæstaréttar liggi fyrir sem fyrst.

Ólöf Nordal innanríkisráðherra hafnaði því í fyrra að loka flugbrautinni. Meirihluti borgarstjórnar var ósáttur við það og taldi að með því væri ekki staðið við samkomulag sem Hanna Birna Kristjánsdóttir, forveri ráðherrans í starfi, hafði gert við borgarstjóra haustið 2013. Borgin taldi nauðsynlegt að brautin færi þar sem aðflug við hana myndi skarast á við byggingu nokkur hundruð íbúða Valsmanna á Hlíðarenda.

Málið endaði endaði fyrir dómstólum. Þann 22. mars síðastliðinn komst Héraðsdómur Reykjavíkur svo að þeirri niðurstöðu að ríkinu sé skylt að loka Norðaustur-suðvestur flugbrautinni sem oft hefur verið kölluð „neyðarbraut" og endurskoða skipulagsreglur fyrir völlinn til samræmis við lokunina innan sextán vikna. Ef ríkið lokar ekki flugbrautinni fyrir þann tíma eða fyrir 12 júlí þarf það að greiða Reykjavíkurborg eina milljón króna í sekt á hverjum degi.

Innanríkisráðherra hefur nú ákveðið að dómnum verði ekki unað og áfrýjað honum til Hæstaréttar. Dagur B. Eggertsson borgarstjóri segir það ekki koma sér á óvart. „Þetta er auðvitað stórt mál en við vonumst til þess, af því það er flýtimeðferð á málinu, að málflutningur verði fyrir réttarhlé í sumar þannig að niðurstaða fáist sem fyrst,“ segir Dagur.

Framkvæmdir hófust á Hlíðarenda fyrir rúmu ári og er þegar búið að fjárfesta fyrir mörg hundruð milljónir króna á svæðinu. „Það eru miklir hagsmunir undir í þessu og við höfum auðvitað gengi í mörg ár út frá því að samningar sem sveitarfélög geri við ríkið haldi og það er prinsippið sem er undir í þessu máli að samningar standi,“ segir Dagur.