Börkur sætti harðræði á Hrauninu

„Það verður að segjast alveg eins og er að það er búið að fara mjög illa með minn skjólstæðing í fangelsi,“ segir Sveinn Guðmundsson, verjandi Barkar Birgissonar. Börkur var í gær sýknaður, ásamt Annþóri Karlssyni, af ákæru um líkamsárás sem á að hafa leitt Sigurð Hólm Sigurðsson til dauða í fangaklefa hans á Litla-Hrauni.

Sveinn telur málatilbúnað ákæruvaldsins litaðan af því að Börkur og Annþór eru alræmdir og hafa hlotið dóma fyrir ofbeldisbrot áður. „Ég held að það sé nokkuð ljóst að það hefur litað málið hverjir þeir eru. En þeir fengu réttlætinu fullnægt. Dómararnir fengu öll gögn til að meta þetta hlutlægt og þetta er niður­staðan, alveg í samræmi við þau gögn sem voru í málinu.“

Sveinn segir að komið hafi verið illa fram við Börk á meðan fangelsisvist hans hefur staðið. „Þegar hann hefur verið að fá heimsóknir frá móður sinni og ungum syni hefur hann verið látinn berhátta sig í hvert sinn og á honum leitað innanklæða án snertingar, án þess að nokkur þörf sé á því. Þetta er handahófskennd aðgerð í fangelsi en þessu þurfti hann að sæta mánuðum saman. Þegar ég komst að þessu þurfti ég að bregðast við svo þessu yrði hætt.“

Þá hafi verið leitað á Berki í tengslum við réttarhöldin. „Þegar hann var hér í réttarhléi og þurfti að fara á Hraunið í hádegismat var hann látinn berhátta sig og leitað á honum innanklæða. Til hvers? Hver átti að hafa borið nokkuð í hann? Fyrir utan að hann er ekki á fíkniefnum.“

Sveinn kom að málinu þegar það var á leið til aðalmeðferðar. Hann segir að þá hafi vantað gögn í málið sem ekki þóttu skipta máli, þar á meðal rýmis- og símahlustun og 22?skýrslur vitna. „Öll gögn skipta máli, sama hversu ómerkileg þau eru. Ef rýmishlustun og símahlustun segja ekkert þá er verið að segja okkur að þeir voru ekki að tala sig saman um neitt sem sneri að málinu.“

Fjölskipaður héraðsdómur Suðurlands komst að þeirri niðurstöðu að þó líklegt væri að rifið milta Sigurðar Hólm hafi dregið hann til dauða, og orðið vegna ytri áverka, hafi ekki tekist að sanna að Börkur og Annþór hafi þar verið að verki.

Helgi Magnús Gunnarsson, saksóknari í málinu, segir að lagst verði yfir málið eftir páska og tekin ákvörðun um hvort áfrýjað verði til Hæstaréttar.

Fréttin birtist fyrst í Fréttablaðinu 24. mars.