Elmar skoraði í dramatískum Íslendingaslag

Theodór Elmar Bjarnason skoraði sitt fyrsta mark á tímabilinu er AGF gerði 2-2 jafntefli við OB.

Markið skoraði hann á tólftu mínútu og var það fyrstu mark dönsku deildarinnar eftir vetrarfrí. AGF komst svo í 2-0 forystu fjórum mínútum síðar er Niklas Backmann skoraði.

OB tryggði sér hins vegar jafntefli með tveimur mörkum snemma í síðari hálfleik. Anders Jacobsen skoraði á 53. mínútu og Mathias Greve tólf mínútum síðar.

Bæði lið fengu tækifæri til að skora eftir þetta og var hiti í leikmönnum en til marks um það fór gula spjaldið sex sinnum á loft á síðustu 20 mínútum leiksins. Einn þeirra sem fékk áminningu var Ari Freyr Skúlason, leikmaður OB.

Jacobsen fékk svo gott færi undir lok leiksins og var nálægt því að tryggja OB sigurinn en hann fór illa að ráði sínu.

Ari Freyr spilaði allan leikinn fyrir OB sem og fyrirliðinn Hallgrímur Jónasson. Theódór Elmar spilaði sömuleiðis allar 90 mínúturnar fyrir AGF.

OB er í sjöunda sæti deildarinnar með 25 stig en AGF í því áttunda með 22 stig.