Harry Kane með tvö mörk og Tottenham komst upp fyrir Arsenal | Úrslit kvöldsins í enska

Tottenham er komið upp í þriðja sæti ensku úrvalsdeildarinnar eftir 3-0 útisigur á Norwich í kvöld en Harry Kane og félagar nýttu sér það að Arsenal-liðið missteig sig enn á ný.

Harry Kane skoraði tvö mörk fyrir Tottenham en Dele Alli skoraði það fyrsta strax eftir aðeins hundrað sekúndur. Sannkölluð draumabyrjun og Tottenham var í frábærum málum eftir mark Kane úr víti á 30. mínútu leiksins.

Þessi tvö mörk frá Harry Kane í kvöld þýða að hann er kominn með 31 mark í ensku úrvalsdeildinni frá 1. janúar 2015. Harry Kane er líka orðinn næstmarkahæstur og er nú þremur mörkum á eftir Jamie Vardy.

West Ham styrkti stöðu sína í sjötta sætinu og fylgir Manchester United eftir en liðið vann 2-0 sigur á tíu mönnum Aston Villa í kvöld. Jordan Ayew fékk rautt spjald strax á 17. mínútu og botnlið Villa mátti ekki við því. Mörk West Ham komu þó ekki fyrr en í seinni hálfleiknum.

Benik Afobe tryggði nýliðum Bournemouth útisigur á Crystal Palace og er Bournemouth-liðið við hlið Chelsea í 14. og 15. sæti með 28 stig. Liðið er nú átta stigum frá fallsæti.

Arsenal nýtti ekki fjölda dauðafæra og þurfti að sætta sig við markalaust jafntefli á heimavelli á móti Southampton.

Jamie Vardy skoraði bæði mörk Leicester City í kvöld þegar liðið vann 2-0 heimasigur á Liverpool og hélt þar með þriggja stiga forskoti sínu á toppi deildarinnar.

Argentínumaðurinn Sergio Agüero var hetja Manchester City liðsins en hann skoraði eina mark leiksins á móti Sunderland þegar hann skoraði snemma í fyrri hálfleiknum.

Manchester United vann sannfærandi 3-0 sigur á Stoke City á Old Trafford í ensku úrvalsdeildinni og hefur þar með skorað þrjú mörk í tveimur leikjum í röð.

Gylfi Þór Sigurðsson og félagar í Swansea City voru ótrúlega nálægt því að landa dýrmætum útisigri á móti West Bromwich Albion.

Gylfi kom Swansea í 1-0 á 63. mínútu og þannig var staðan þar til í uppbótartíma leiksins þegar José Salomón Rondón náði að skora jöfnunarmarkið eftir mikla orrahríð upp við mark Swansea.



Úrslitin og markaskorarar í ensku úrvalsdeildinni í kvöld:

Arsenal - Southampton    0-0

Leicester - Liverpool    2-0

1-0 Jamie Vardy (60.), 2-0 Jamie Vardy (71.)

Norwich - Tottenham    0-3

0-1 Dele Alli (2.), 0-2 Harry Kane,víti (30.), 0-3 Harry Kane (90.)

Sunderland - Manchester City    0-1

0-1 Sergio Agüero (16.)

West Ham - Aston Villa    2-0

1-0 Michail Antonio (58.), 2-0  Cheikhou Kouyaté (85.)

Crystal Palace - Bournemouth    1-2

1-0 Scott Dann (27.), 1-1 Marc Pugh (34.), 1-2 Benik Afobe (57.)

Manchester United - Stoke    3-0

1-0 Jesse Lingard (14.), 2-0 Anthony Martial (23.), 3-0 Wayne Rooney (53.)

West Bromwich - Swansea    1-1

0-1 Gylfi Sigurðsson (63.), 1-1 José Salomón Rondón (90.+1).