Segir óraunhæft að stefna á fjóra titla

Manuel Pellegrini, knattspyrnustjóri Manchester City, telur óraunhæft fyrir leikmenn liðsins að stefna að því að vinna alla fjóra bikarana sem í boði eru.

Pellegrini sat fyrir svörum blaðamanna í dag fyrir leik liðsins gegn Aston Villa í FA-bikarnum um helgina en Manchester City situr í öðru sæti ensku úrvalsdeildarinnar, mætir Dynamo Kiev í 16-liða úrslitum Meistaradeildarinnar og er komið í úrslit enska deildarbikarsins.

Þrátt fyrir að vera í góðri stöðu í öllum keppnum telur Pellegrini að það sé ekki raunhæft að stefna að því að hampa titlinum í öllum keppnum.

„Um leið og ég nefni það þá munu fjölmiðlar tala um það að markmiðið sé að vinna alla fjóra titlana. Það er einfaldlega ekki raunhæft markmið fyrir okkur. Það verður erfitt að spila alla þessa leiki á jafn stuttum tíma og raun ber vitni,“ sagði Pellegrini sem sagðist þó ætla að tefla fram sterku liði um helgina.

„Við verðum að vera tilbúnir í leikinn á morgun því þetta verður erfitt verkefni. Ef við töpum þessum leik erum við dottnir úr keppninni og við þurfum því að tefla fram sterku liði.“