Kolbeinn kom Nantes á bragðið

Kolbeinn Sigþórsson skoraði fyrra mark Nantes í 2-2 jafntefli gegn Bordeaux í frönsku úrvalsdeildinni í kvöld.

Kolbeinn fékk boltann inn fyrir vörn Bordeaux strax á upphafsmínútu leiksins og kláraði færið af yfirvegun.

Þetta var annað mark Kolbeins í síðustu þremur deildarleikjum en hann hefur byrjað árið 2016 mjög vel sem veit á gott fyrir íslenska landsliðið. Kolbeinn fór af velli þegar stundarfjórðungur var til leiksloka.

Á 30. mínútu kom Bandaríkjamaðurinn Alejandro Bedoya Nantes í 2-0 og þannig var staðan fram á 84. mínútu þegar Cheick Diabaté minnkaði muninn fyrir Bordeaux. Allt stefndi í heimasigur þegar gestirnir jöfnuðu í uppbótartíma en markið var sjálfsmark. Lokatölur 2-2.

Eftir jafnteflið er Nantes með 29 stig í ellefta sæti deildarinnar. Liðið er ósigrað í síðustu átta deildarleikjum sínum en þar af var um að ræða sjöunda jafnteflið í leikjunum átta.

Uppfært klukkan 23:59

Í fyrri útgáfu fréttarinnar stóð að Nantes hefði unnið leikinn.