Kolbeinn: Verkjalaus og það er æðislegt

Kolbeinn Sigþórsson, landsliðsframherji og leikmaður Nantes í Frakklandi, hefur verið að standa sig vel í frönsku deildinni að undanförnu og skorað nokkur mörk eftir rólega byrjun á sínu fyrsta tímabili í deildinni.

Kolbeinn var í viðtali á Akraborginni á X-inu í dag og segir að líðanin sé mun betri eftir að hann byrjaði að skora meira.

„Það er mikilvægast fyrir framherja að skora mörk og maður þrífst á því. Ég hef verið að skora síðustu vikur og finnst ganga vel núna,“ sagði Kolbeinn í viðtalinu.

„Maður veit alltaf best sjálfur hvernig staðan er og þetta kom kannski vel út í fjölmiðlum. En fólk vissi ekki að ég var að glíma við mikið af meiðslum og ég var alveg rólegur. Ég vissi að það myndi ganga betur þegar ég næði að æfa almennilega.“

Sjá einnig: Kolbeinn hefur tekið verkjatöflur fyrir hvern einasta leik

„Mér líður vel í líkamanum núna og það er ekkert að. Það er mikilvægast,“ sagði Kolbeinn og bætir við að hann hefði aldrei misst trúna þrátt fyrir erfið meiðsli.

„Ég er kominn með það góða reynslu af meiðslum að ég veit að þegar ég næ mér góðum á ný þá fer ég að spila vel aftur. Yfirleitt tekst mér að spila vel þegar formið er gott. Þessi helvítis meiðsli stoppa mann stundum í þessu og það er það sem er verst fyrir fótboltamanninn, sem er dæmdur út frá frammistöðunni á vellinum.“

„Eins og er núna er ég alveg verkjalaus og það er alveg æðislegt. Þegar líkaminn er góður getur maður gert meira á æfingum og í leikjum. Ég er ekki að glíma við nein meiðsli og er og nýt þess.“

Kolbeinn segir að það hafi aldrei komið til greina að fara frá Nantes og segist hann vilja vera áfram í deildinni. Viðtalið má heyra í heild sinni hér efst í fréttinni.