Vidic hættur í fótbolta

Nemanja Vidic, fyrrum fyrirliði Manchester United og serbneska landsliðsins, tilkynnti í dag að hann sé hættur að spila fótbolta.

Hinn 34 ára gamli Nemanja Vidic segir langvinn meiðsli vera aðalástæðuna fyrir þessari ákvörðun en að hans mati þolir skrokkurinn hans ekki meira.

Nemanja Vidic lék með Manchester United frá 2006 til 2014 en hefur síðan spilað með ítalska félaginu Internazionale.

„Það er kominn tími fyrir að setja skóna upp á hillu. Meiðslin undanfarin tímabil hafa tekið sinn toll. Ég vil nota tækifærið og þakka öllum leikmönnunum sem ég hef spilað með og senda um leið stóra þakkakveðju til stuðningsmannanna sem hafa staðið með mér öll þessi ár," sagði Nemanja Vidic í sérstakri yfirlýsingu á heimasíðu Manchester United.

Nemanja Vidic og Rio Ferdinand voru hjartað í vörn Manchester United á sínum tíma og Vidic varð fimm sinnum enskur meistari með félaginu auk þess að vinna Meistaradeildina 2008.  Vidic var mjög vinsæll meðal stuðningsmanna Manchester United enda frábær leikmaður.

Nemanja Vidic kom til Manchester United frá Spartak Moskvu í janúar 2006 og kostaði Manchester United í kringum sjö milljónir punda.

Nemanja Vidic spilaði 56 leiki fyrir serbneska landsliðið frá 2002 til 2011 en hætti í landsliðinu eftir að Serbum mistókst að komast á EM 2012.