Rúmlega 600 nemendur brautskráðir frá HR

641 nemandi brautskráðist frá Háskólanum í Reykjavík við hátíðlega athöfn í Hörpu í dag. Alls voru 443 nemendur brautskráðir úr grunnnámi, 196 úr meistaranámi og tveir nemendur útskrifuðust með doktorsgráðu.

Í tilkynningu kemur fram að flestir hafi lokið námi frá viðskiptadeild skólans eða alls 225 nemendur. Þar af voru 107 að ljúka meistargráðu og einn doktorsgráðu. Úr tækni- og verkfræðideild háskólans útskrifuðust 211 nemendur, þar af 54 með meistaragráðu. Þá útskrifaði lagadeild skólans 68 nemendur, þar af 33 með meistaragráðu. Tölvunarfræðideild útskrifaði 137 nemendur, þar af tvo með meistaragráðu

og einn með doktorsgráðu.

Í ávarpi sínu fjallaði Ari Kristinn Jónsson, rektor HR, meðal annars um mikilvægi þess að fjárveitingar til háskóla á Íslandi verði sambærilegar við það sem gerist í nágrannalöndunum:

„Vegna mikilvægis háskólastarfs fyrir framtíð Íslands hefur vísinda- og tækniráð, undir formennsku forsætisráðherra, samþykkt að íslenskir háskólar skuli vera jafn vel fjármagnaðir og norrænir háskólar árið 2020, en í dag vantar um helming þar upp á. Fjármögnun í takt við okkar nágrannalönd er forsenda þess að háskólar geti sinnt þörfum framtíðarinnar og stutt við hagvöxt. En því miður er það svo að nýsamþykkt

fimm ára fjárhagsáætlun stjórnvalda er í hróplegu ósamræmi við þessi markmið, því þar er litlu bætt við fjármögnun háskóla. Þetta verður að laga, samkeppnishæfni Íslands til framtíðar er að veði,“ sagði Ari Kristinn.

Katrín Olga Jóhannesdóttir, stjórnarformaður Já ehf. og formaður Viðskiptaráðs Íslands, veitti verðlaun Viðskiptaráðs fyrir framúrskarandi námsárangur í grunnnámi. Þau hlutu Ólafur Valur Guðjónsson, BA í lögfræði; Tómas Arnar Guðmundsson, BSc í hugbúnaðarverkfræði, Vaka Valsdóttir, BSc í sálfræði og Ari Páll Ísberg, BSc í heilbrigðisverkfræði.