Carlos Tevez skallaður í "vináttuleik" | Myndband

Það var lítil vinátta í gangi þegar River Plate vann 1-0 sigur á Boca Juniors í vináttuleik erkifjenda argentínska fótboltans um helgina.

Alls voru fimm leikmenn reknir útaf og leikmenn Boca Juniors voru orðnir átta inn á vellinum þegar River Plate fékk sín tvö rauð spjöld.

Tímablið er ekki í gangi og liðin eru því að undirbúa sig fyrir komandi átök. Leikir Boca Juniors og River Plate er einn þekktasti nágrannaslagur í heiminum og hitinn verður oft ekki meiri á milli tveggja liða á fótboltavellinum.

Patricio Loustau, dómari leiksins, dæmdi 40 brot í leiknum, gaf fimm rauð spjöld og níu gul spjöld. Undir lokin varð allt vitlaust.

Carlos Tevez, fyrrum leikmaður West Ham, Manchester United og Manchester City, var skallaður í leiknum og fékk Jonathan Maidana hjá River Plate rautt spjald fyrir þann gjörning.

„Hvorugur okkar hegðaði sér vel," sagði Carlos Tevez um samskipti hans og Jonathan Maidana sem enduðu með fyrrnefndum hætti en Sky Sports fjallaði um leikinn.

Leonardo Pisculichi, sem fékk líka rautt spjald, skoraði sigurmarkið í leiknum en það kom úr vítaspyrnu á 17. mínútu sem dæmd var á Carlos Tevez fyrir að handleika knöttinn.

Carlos Tevez og félegar í Boca Juniors eiga í miklum vandræðum með sig þessa dagana því fjórum dögum áður voru tveir leikmenn liðsins reknir af velli í 4-2 tapi á móti Racing Club.

„Við erum búnir að fá fimm rauð spjöld á fjórum dögum. Við verðum að fara þroskast," sagði Carlos Tevez.

Hér fyrir neðan má sjá svipmyndir frá þessum ótrúlega vináttulausa vináttuleik en atvikið með Carlos Tevez kemur eftir rétt rúmar níu mínútur.