Real Madrid reynir að kaupa Casilla

Joan Collet, forseti spænska liðsins Espanyol, segir að félagið hafi neitað tilboði frá Real Madrid í markvörðinn Kiko Casilla.

Real Madrid leitar nú að eftirmanni Iker Casillas en félagið gaf það út fyrr í kvöld að Casillas muni ganga í raðir Porto á næstu dögum. Real Madrid hefur ítrekað reynt að kaupa David De Gea frá Manchester United en ljóst er að Casilla er einnig undir smásjánni hjá Real Madrid.

"Collet er búinn að hitta blaðamenn. Hann skýrði frá því að félagið hafi neitað tilboði frá R. Madrid í K. Casilla," segir á Twitter-síðu Espanyol-liðsins.

Casilla er 28 ára gamall og kom upp í gegnum unglingaakademíu Real Madrid. Hann lék með B og C liði félagsins áður en hann gekk í raðir Espanyol árið 2007.

Casilla á einn landsleik fyrir Spánverja að baki en það var æfingaleikur gegn Þjóðverjum á síðasta ári.