Sér fram á enn verri neyð

„Á heildina litið eru það held ég um 100 milljónir manna sem þurfa á mannúðaraðstoð að halda um heim allan, og fjárþörfin er metin á um 18 milljónir dala,“ segir Kyung-Wha Kang, yfirmaður Samæfingarskrifstofu mannúðaraðstoðar hjá Sameinuðu þjóðunum, sem var hér á landi í stuttri heimsókn í gær.

Hún segir þörfina fyrir fjárframlög hafa verið að hækka, en það sé ekki vegna þess að gjafaframlögin hafi dregist saman heldur hafi fjárþörfin aukist hraðar en framlögin.

„Þannig hefur bilið haldið áframm að breikka. Og það getur ekki gengið til lengdar. Það sem við þurfum er því í fyrsta lagi að finna pólitískar lausnir á þessum miklu átökum. Ekkert bendir hins vegar til þess að þær lausnir séu í sjónmáli. Að minnsta kosti ekki á þessu ári,“ segir Kang.

„Auk þess eru líkur á því að nýjar þarfir spretti upp í Jemen eða Líbíu, svo dæmi séu tekin. Þannig að allt bendir til þess að þörfin fyrir aðstoð muni aukast á þessu ári.“

Hún segir þess vegna nauðsynlegt að fara nýjar leiðir, hugsa út fyrir boxið, til að afla fjár til mannúðaraðstoðar. Ban Ki Moon, framkvæmdastjóri Sameinuðu þjóðanna, hafi í þessum tilgangi meðal annars efnt til samráðsfunda með sérfræðingum, þar á meðal úr fjármálaheiminum og einkageiranum, til að finna nýjar leiðir til fjármögnunar.

Verst er ástandið í fjórum stríðshrjáðum löndum: Sýrlandi, Írak, Mið-Afríkulýðveldinu og Suður-Súdan. Um 80 prósent af fjárþörfinni nú sé í þessum fjörum löndum.

„Það þýðir samt ekki að neyðarástand ríki ekki víðar,“ segir hún og nefnir Austur-Kongó, Afganistan og Sómalíu sem dæmi um lönd þar sem ástandið hefur lengi verið mjög erfitt.

Í Úkraínu hefur ástand almennings einnig haldið áfram að versna þrátt fyrir samkomulag um vopnahlé sem gert var í vetur.

„Það mun ekki lagast að ráði fyrr en nokkuð örugg þróun hefst í áttina að friði. Við höfum verið að veita aukna mannúðaraðstoð bæði á svæðum sem uppreisnarmenn hafa á sínu valdi og einnig á svæðum sem stjórnin ræður yfir, en þarna þurfti enga mannúðaraðstoð áður en átökin hófust.“