Hæstiréttur staðfestir frávísun á ákæru í verðsamráðsmálinu

Hæstiréttur Íslands hefur staðfest úrskurð Héraðsdóms Reykjaness að vísa ákæru sérstaks saksóknara á hendur einum sakborninga í verðsamráðsmálinu svokallaða frá dómi.

Málið snýr að þrettán starfsmönnum Byko, Húsasmiðjunnar og Úlfsins en þeim er gefið að sök að hafa átt í verðsamráði til að koma í veg fyrir að verslanirnar ættu í samkeppni. Málið er eitt það umfangsmesta sem komið hefur á borð sérstaks saksóknara. Sakborningarnir hafa allir neitað sök í málinu.

Frávísunarkrafa mannsins var lögð fram í Héraðsdómi Reykjaness í nóvember. Hann var um tvítugt þegar meint brot hans áttu sér stað og starfaði sem sölumaður í einni af verslununum. Hann var ákærður fyrir að hafa athugað verð samkeppnisaðila í símtali við einn af starfsmönnum þeirrar verslunar. Upplýsti maðurinn svo yfirmann sinn um verðin í tölvupósti.

Ákærunni var vísað frá dómi þar sem ekki hefði legið fyrir kæra frá Samkeppniseftirlitinu til lögreglu vegna meintra brota hans. Er það í verkahring Samkeppniseftirlitsins að taka ákvörðun um hvort að einstaklingur yrði kærður til lögreglu vegna brots gegn samkeppnislögum. Því hefði lögreglu og ákæruvaldi verið óheimilt að taka mál mannsins til rannsóknar og útgáfu ákæru á hendur honum.