10 ára drengur skutlaði ölvuðum pabba sínum heim

Lögregla í uppsveitum New York handtók um helgina 46 ára karlmann sem var ölvaður í bíl sínum. Hann var þó ekki við stýrið, 10 ára gamall sonur hans sá um það.

Lögreglan í Saratoga-sýslu fékk tilkynningu frá ökumanni um að hann hefði örugglega séð ungan dreng keyra pallbíl á þjóðveginum. Lögreglan brást við um leið og hafði uppi á bílnum. Þar kom í ljós að ökumaðurinn var vissulega 10 ára gamall drengur og að hann væri bara að keyra pabba sinn heim sem gæti það ekki sökum ölvunar.

Ættingjar sóttu drenginn á næstu lögreglustöð. Faðirinn hefur verið ákærður fyrir að ógna velferð barnsins og fyrir að hafa leyft einhverjum án ökuleyfis að keyra bílinn sinn.