Halda upp á fimm ára afmæli í fjórum borgum

Listahátíðin Festisvall fagnar á fimm ára starfsafmæli í sumar í fjórum Evrópuborgum með tónleikum og myndlistarsýningu.

„Þetta átti að vera voðalega einfalt allt saman, við ákváðum að gera plakatasýningu af því að það væri einfalt og þægilegt að ferðast með,“ segir Dóra Hrund Gísladóttir myndlistarkona og annar stjórnandi Festisvalls glöð í bragði.

Umfang afmælishátíðarinnar óx því og verður boðið upp á tónleika og gjörninga auk myndlistarsýninga. „Það eru allir búnir að vera svo til í þetta og við erum búin að fá svo góðar viðtökur, þess vegna er þetta búið að stækka svona mikið,“ segir hún en undirbúningur fyrir afmælishátíðina, sem nefnist Festisvall Fünf, hófst í desember síðastliðnum en Festisvall hóf göngu sína árið 2010 í Hjartagarðinum og var stofnuð af myndlistarmanninum Árna Má Erlingssyni.

Þema hátíðarinnar í ár er matur og munu gjörningar, uppákomur og tónleikar endurspegla það á ólíkan máta.

Festisvall Fünf mun ferðast frá Reykjavík til Leipzig, Berlínar og Amsterdam og taka tuttugu íslenskir, þýskir og hollenskir listamenn þátt í hátíðinni. Dóra segir skemmtilegt að sýna í fjórum ólíkum rýmum.

„Við erum að fara með sömu sýninguna í fjögur rými en hún er í rosalega mismunandi samhengi á hverjum stað þó þetta séu sömu verkin.“

Í Reykjavík verður sýningin sett upp þann 22. ágúst í almenningsrými á Hverfisgötu í samstarfi við Kex Hostel á Menningarnótt. Tónleikarnir fara fram daginn áður í Iðnó þar sem fram koma Berndsen, Hermigervill, Good Moon Deer, M-Band og East of My Youth.

Festisvall stendur nú fyrir söfnun á Karolinafund vegna afmælishátíðarinnar.