Óð út í sjóinn sem náði upp að höku

Hvað ertu gömul, Klara Kristín? Ég er fimm ára. 

Hvað þykir þér skemmtilegast við sumarið? Að fara á ströndina og fara alveg hingað upp í sjónum (setur höndina á hökuna a sér). 

Hefur þú farið í einhver ferðalög í sumar? Já, til Danmerkur. 

Nú, hvað gerðir þú þar? Á þremur dögum fór ég út í rigningu og á einum degi fór ég út í sól, það var fyrsta daginn. Ég fór í City 2-mollið alla dagana og fór líka í Tívolíið, þar prófaði ég í fallturninn og sjóræningjaskipið. 

En hefurðu eitthvað ferðast um Ísland? Já, ég fór á Selfoss um daginn og skoðaði gamla húsið hans pabba, svo vorum við í bústað rétt hjá Geysi og fórum í gönguferð um svæðið. Við skoðuðum líka Gullfoss.

Þekkir þú einhverjar plöntur í íslenskri náttúru? Ummm… ja, grasplöntur, fífla, biðukollur, baldursbrá og bara öll blóm sem ég þekki. 

Hvaða blóm er í mestu uppáhaldi hjá þér? Baldursbrá. 

Þekkir þú einhverja fugla? Já, dúfur, himbrima, endur, máva, lóuna, starra, krumma, hrossagauk og bláskaða. Ég þekki ekki fleiri. 

Hver finnst þér fallegasti íslenski fuglinn? Himbrimi, hann er hvítur og svartur og ég elska hvítt og svart. 

Safnar þú einhverju? Já, ég safna dýrum, böngsum og fötum. En á ég að segja þér hvað er það dýrmætasta sem ég á? 

Já, endilega.

Peningar.