Hundruðum þúsunda kvenna nauðgað

Það voru ekki bara sovéskir hermenn sem nauðguðu þýskum konum við lok seinni heimsstyrjaldarinnar og á tímanum þar á eftir, heldur einnig bandarískir. Þetta kemur fram í nýútkominni bók, Als die Soldaten kamen (Þegar hermennirnir komu), eftir þýska sagnfræðiprófessorinn og blaðamanninn Miriam Gebhardt.

Í viðtali við sænska blaðið Dagens Nyheter kveðst Gebhardt hafa fundið gögn í Bæjaralandi um nauðganir bandarískra hermanna. Það hafi vakið forvitni hennar þar sem áður hafi eingöngu verið skrifað um nauðganir hermanna í Rauða hernum. Bandaríkjamenn hafi hins vegar ekki bara verið frelsarar.

Gebhardt segir að í kalda stríðinu hafi nauðganir Rauða hersins verið notaðar í pólitískum tilgangi. Ekki hafi verið um að ræða samúð með konunum.

Það er mat sagnfræðiprófessorsins að um 860 þúsundum þýskra kvenna hafi verið nauðgað á fyrrgreindu tímabili. Mat hennar er byggt á vitneskjunni um þann fjölda barna sem þýskar konur eignuðust með hermönnunum og að fimm prósent þeirra hafi fæðst í kjölfar nauðgunar.

Að sögn Gebhardt var ekki um skipanir að ofan að ræða. Hún kveðst hafa fundið dæmi um harða dóma yfir hermönnum. Flestir hafi þó sloppið.