Vilja geta vopnað alla lögreglumenn

Hlífðarbúnaður lögreglumanna sem starfa við mannfjöldastjórnun er að meginhluta úr sér genginn og þarf að endurnýja hann sem og margvíslegan búnað sérsveitar ríkislögreglustjóra sem er áratugagamall og þarfnast endurnýjunar. Þetta er mat höfunda greinargerðar um eflingu viðbúnaðar lögreglunnar.

Birgitta Jónsdóttir, þingkona Pírata, gagnrýnir greinargerðina og segist frekar vilja nýta fjármagn til að fjölga óbreyttum lögreglumönnum í lögregluliðum landsins en til kaupa á búnaði fyrir sérsveitarmenn. „Við erum að sjá á landinu mjög fáa lögreglumenn með starfsskyldur á allt of stóru svæði. Ég væri til í að fjölga lögreglumönnum og veita mönnum þá meiri hvíld og öryggi,“ segir Birgitta.

Höfundar greinargerðarinnar eru Jón Bjartmarz yfirlögregluþjónn, Guðmundur Ó. Þráinsson aðstoðaryfirlögregluþjónn og Ásgeir Karlsson aðstoðaryfirlögregluþjónn. Segjast þeir, í greinargerðinni, vilja kaupa á fjórða hundrað skotvopna fyrir lögreglulið landsins.

Að mati höfunda er nauðsynlegt að geta vopnað alla vakthafandi lögreglumenn hjá lögregluliðum utan höfuðborgarsvæðisins með hríðskotarifflum. Lágmarksbúnaður fyrir lögreglusveitir á landsbyggðunum er að þeirra mati tvær skammbyssur, tveir hríðskotarifflar, tvö skotheld vesti, skothjálmar og skotskildir til að bregðast við vopnamálum, eins og það er orðað í skýrslunni.

„Óforsvaranlegt er að senda óvopnaða lögreglumenn í slík verkefni,“ segir í skýrslunni. Kostnaður við æskileg búnaðarkaup er á annað hundrað milljónir króna.

Telja lögreglumenn líkur á vopnuðum hryðjuverkum á Íslandi hafa aukist undanfarin ár líkt og í hinum vestræna heimi. Af þeim sökum þurfi að efla viðbúnað lögreglunnar. Þessu er Birgitta ósammála. „Það er oft verið að skrifa skýrslur um vá sem er ekki til þar sem verið er að búa til grýlur úr einhverju sem við eigum ekki að hafa áhyggjur af.

Það sem ógnar stöðugleika á Íslandi er frekar menn eins og Kristján Loftsson sem gulltryggir verkfall stórra hópa. Ég hef meiri áhyggjur af því,“ segir Birgitta.