Vilja einfalda stofnanakerfið

Í nýrri skýrslu Ríkisendurskoðunar um málefni innflytjenda og útlendinga á Íslandi er innanríkisráðuneytið hvatt til þess að ljúka sem fyrst heildarendurskoðun laga um málefni útlendinga. Þar kemur fram að Ríkisendurskoðun telji að stjórnvöld þurfi að framfylgja betur stefnu sinni og lagaákvæðum um málefni innflytjenda.

Í skýrslunni er fjallað um málefni innflytjenda og útlendinga á Íslandi. Innanríkisráðuneytið annast þau málefni útlendinga sem varða dvöl þeirra og búsetu hér á landi og jafnframt mál hælisleitenda.

Velferðarráðuneytið og stofnanir þess annast á hinn bóginn málefni innflytjenda auk þess að sinna málefnum flóttamannahópa og atvinnumálum útlendinga. Að mati Ríkisendurskoðunar felast ýmsir annmarkar í þessari tvískiptingu. Meðal annars telur stofnunin að afgreiðsla dvalar- og atvinnuleyfa útlendinga sé flóknari og tímafrekari en hún þyrfti að vera þar sem við afgreiðslu mála þurfi báðar þessar stofnanir að koma að. Telur Ríkisendurskoðun að af þessu hljótist kostnaður fyrir ríkið sem hægt væri að minnka með einföldun stjórnsýslunnar. Kannað verði hvort rétt sé að færa málaflokkinn undir eitt ráðuneyti og einfalda stofnanakerfið.