Ekki svarað fjögurra ára gamalli kvörtun

Umboðsmaður Alþingis hefur enn ekki svarað kvörtun Heiðars Más Guðjónssonar fjárfestis, sem hann sendi embættinu árið 2010. „Hann hefur lofað því vel á þriðja ár að svar komi í næstu viku svo ég veit ekki hvað ég á að halda lengur,“ segir Heiðar Már.

Heiðar Már kvartaði til umboðsmanns Alþingis í nóvembermánuði árið 2010 sökum þess að eignarhaldsfélag Seðlabanka Íslands hefði ekki staðið nægilega vel að málum varðandi sölu ríkisins á Sjóvá. Ursus, félag í eigu Heiðars Más, hefði boðið tæplega ellefu milljarða króna í félagið en að hans sögn hefði honum verið ýtt út úr söluferlinu.

Síðar var Sjóvá selt öðrum aðilum fyrir lægri upphæð en Ursus bauð. „Þetta mál snýr að sölu á eigum ríkisins. Þar buðum við tæpa ellefu milljarða króna. Félagið er síðan selt fyrir um 9,3 milljarða. Tjón skattgreiðenda er því mikið. Eins og hlutirnir hafa þróast er mitt tjón um þrír milljarðar króna,“ segir Heiðar Már.

Tryggvi Gunnarsson, umboðsmaður Alþingis, segir rétt að málið hafi dregist en von sé á að svar berist fljótlega. „Þegar málið kemur hingað inn á borð er því ekki lokið af hálfu stjórnvalda en það er skilyrði þess að umboðsmaður geti fjallað um kvörtun.

Það var síðan niðurstaða ríkissaksóknara árið 2012 að rannsókn hinna meintu brota skyldi hætt og þá var ekki tilefni til þess að umboðsmaður skoðaði þau atvik. Hins vegar vörpuðu atvik sem fram komu í þessari kvörtun ljósi á ýmis almenn atriði svo sem um birtingu á reglum Seðlabankans á sínum tíma og fyrirkomulag ákveðinna atriða í starfi bankans og í lögum um þessi mál.

Það hefur legið fyrir um nokkurn tíma að þessu máli yrði lokið af minni hálfu sem frumkvæðismáli um þessi almennu atriði. Ég hafði vonast til þess að þessu máli væri lokið nú en annir við afgreiðslu á kvörtunum hafa leitt til þess að það hefur ekki tekist,“ segir Tryggvi.

Umboðsmaður Alþingis hefur ítrekað tjáð Alþingi að auka þurfi fjárveitingar til embættisins ef stofnunin eigi að geta sinnt öllum þeim verkefnum sem hún á að sinna.

Í júní á síðasta ári benti Heiðar Már á að enn hefði ekkert svar borist frá umboðsmanni. „Ég inni hann eftir svörum opinberlega síðastliðið sumar. Þá var lofað bót og betrun. Síðan hefur ekkert gerst og ég bíð áfram. Þessi kvörtun mín snýr að íslenskri stjórnsýslu. Svo virðist sem einstakir embættismenn hafi hugsanlega látið persónulega skoðun á mönnum ráða ferðinni frekar en hvað lögin segja,“ segir Heiðar Már.