Uppbygging auki vægi fossins

Jóhann Óli Eiðsson skrifar 2. febrúar 2015 07:00

Tölvugerð mynd sýnir staðsetningu hótelsins.

Gimlé, rannsóknarsetur í skipulagsfræðum við Landbúnaðarháskóla Íslands, hefur skilað af sér umsögn um breytingu á deiliskipulagi á jörð Ytri-Skóga við Skógafoss.

Meðal þess sem áætlað er að byggja er hótel og þéttbýliskjarni fyrir tvö hundruð íbúa. Hugmyndir um uppbyggingu við svæðið reyndust umdeildar og fól því sveitarstjórnin Gimlé verkið í maí á síðasta ári.

Meðal þeirra atriða sem metin voru er hvort tillagan bæti aðstöðu fyrir ferðaþjónustu og uppbyggingu slíkrar þjónustu og einnig hvort hún rýri önnur landgæði á svæðinu.

Við greiningu sína setti Gimlé Skógafoss í fyrsta sæti. Í niðurstöðunum kemur fram að breytingarnar skapi verulega aukningu á gistirýmum og annarri aðstöðu sem tengist ferðaþjónustu.

Þar kemur einnig fram að ekki sé hægt að sjá að breytingarnar muni rýra önnur landgæði heldur muni þvert á móti koma til með að gefa Skógafossi aukið vægi. Bílastæði og tjaldsvæði muni færast fjær fossinum og opna ýmsa möguleika tengda honum.

Niðurstöðuna má sjá í heild sinni á heimasíðu Rangárþings eystra, www.hvolsvollur.is.

Fyrirhugað er að halda kynningu á niðurstöðum úttektarinnar í byrjun febrúar í Fossbúð í Skógum. Nákvæm tímasetning liggur ekki fyrir en fundurinn verður öllum opinn.

Tengdar fréttir

Nýtt hótel á Skógum og tvö önnur í bígerð

Sveitarstjóri Rangárþings eystra segir að menn verði strangir á því hverskonar byggingar verði leyfðar á þessum viðkvæma stað.

14. apríl 2014 21:15

Skógar skipulagðir sem þéttbýliskjarni

Það er ekki á hverjum degi sem Ísland fær nýjan þéttbýliskjarna. Sveitarfélag á Suðurlandi hefur nú markað þá stefnu að tvöhundruð manna þorp skuli byggjast upp við Skógafoss.

18. apríl 2014 19:45

Fagleg deiliskipulagsvinna við Skógafoss

Undanfarið hefur tillaga um breytingu á deiliskipulagi á Ytri-Skógum á svæðinu við Skógafoss verið í auglýsingu og kynningu. Í upphafi var kappkostað að ná samstöðu í sveitarstjórn um tillöguna en sú samstaða brást á ögurstundu. Ástæða breytingarinnar er sú að áhugasamir aðilar vilja fjárfesta í uppbyggingu á hóteli og aðrir í uppbyggingu á þjónustusvæði.

5. júní 2014 07:00

Háskóla falið að skoða skipulag við Skógafoss

Sveitarstjórn Rangárþings eystra samþykkti á fundi í gær að leita eftir áliti óháðra fagaðila á umdeildri deiliskipulagstillögu við Skógafoss, þar sem meðal annars er gert ráð fyrir stóru hóteli.

9. maí 2014 15:00

Óttast að nýtt hótel skyggi á Skógafoss

Meirihluti fulltrúa sat hjá þegar samþykkt var í skipulagsnefnd Rangárþings eystra að kynna deiliskipulag sem gerir kleift að reisa um 300 manna hótel við Skógafoss. Formaður nefndarinnar sagði málið vel undirbúið og sveitarstjórnin samþykkti.

10. mars 2014 08:30