Verktakar deila við Akureyrarbæ

Framkvæmdastjórar nokkurra verktakafyrirtækja á Akureyri  furða sig á því að Akureyrarbær beini jarðvinnuverkefnum sínum aðallega til eins fyrirtækis. Þeir segja að bæjarstjóri hafa boðað breytingar fyrir ári síðan, en svo virðist sem að framkvæmdadeildin hunsi hreinlega fyrirmæli bæjarstjóra.

Fyrirtækin sem um ræðir eru GV-Gröfur, G.Hjálmarsson og Malbikun KM, Garðtækni og Garðverk.

Verktakafyrirtækin óskuðu eftir upplýsingum úr bókhaldi Akureyrarbæjar um viðskipti framkvæmdadeildar bæjarins við jarðvinnuverktaka á tímabilinu júní 2014 til nóvember 2014. Í tilkynningu frá fyrirtækjunum segir að um sé að ræða verkefni sem ekki hafi þurft að bjóða út.

Í tilkynningunni segir að forsaga málsins sé að á fundi verktaka með bæjarstjóra og fulltrúum framkvæmdadeildar þann 10. apríl 2014 voru boðaðar breytingar af hálfu bæjarins vegna slíkra viðskipta, þannig að sem mest af viðskiptunum færu í útboðsferli.

Hins vegar bóli ekkert á slíkum breytingum.

Samkvæmt skráningu bæjarins á tímabilinu júní 2014 til nóvember 2014 kemur í ljós að fyrirtæki í eigu sama aðilans vann liðlega þriðjung allra fyrrgreindra verka á vegum framkvæmdadeildar bæjarins á þessu tímabili. Fyrirtækin sem bærinn átti í viðskiptum við á þessu tímabili, voru hátt í þrjátíu talsins.

Framkvæmdastjórarnir segja verulega fjármuni í húfi og þess vegna veki furðu að deild á vegum Akureyrarbæjar beini liðlega þriðjungi viðskipta vinna til sama aðilans, án útboða.