Aðsóknarmet slegin á Landspítalanum

Framkvæmdastjórn Landspítalans kom saman til fundar klukkan eitt í dag til að ræða ástandið sem hefur verið á spítalanum að undanförnu. Gríðarlegt aðflæði hefur verið á spítalanum en í gær var aðsókn slík að met voru slegin. Síðustu dagar hafa verið afar þungir, mikið um innlagnir og erfiðlega hefur gengið að útskrifa sjúklinga.

Stjórnin fundaði síðdegis í gær um ástandið en eftir þann fund hafði tekist að koma flestum sjúklingum sem biðu á legudeildir, að því er fram kemur á vef Landspítalans. Ákveðið var að fresta hjartaþræðingum, flestar legudeildir taka nú til sín fleiri yfirlagnir en áður og tekin var ákvörðun um að fresta uppfærslu klíniskra kerfa til að hætta ekki á að hnökrar hlytust af slíku.

Framkvæmdastjórnin segir það þakkarvert hversu mjög starfsfólk spítalans hefur lagt sig fram við að leysa þau verkefni sem hrönnuðust upp á spítalanum.

Fjallað var um ástandið á Landspítalanum í kvöldfréttum Stöðvar 2 í gær eins og sjá má hér fyrir neðan.