Borgarráð samþykkti á síðasta ári að færa styttuna af Klambratúni og tók þannig undir áskorun frá áhugahópi um skáldið sem taldi að minningu Einars væri meiri sómi sýndur með því að koma verkinu fyrir í nágrenni Höfða þar sem hann bjó um tíma.
Reykjavík Bókmenntaborg UNESCO hefur sett upp bókmenntamerkingu við Höfða þar sem hægt er að kynna sér sögu skáldsins. Á svokölluðum skáldabekk er hægt að hlusta á upplestur, á íslensku og ensku, á ljóðunum Brim og Norðurljós eftir Einar Benediktsson. Upplesturinn má nálgast með snjallsíma í gegnum QR kóða.
Á vef Reykjavíkurborgar segir að Einar Benediktsson (1864-1940) hafi verið skáld og athafnamaður sem bjó í Höfða á árunum 1914-1917. „Hann var heimsborgari og hugsjónamaður, ferðaðist víða og lagði fram nýstárlegar og stórbrotnar hugmyndir um þjóðfélagsumbætur, sem hafa haldið nafni hans á lofti, þótt þær yrðu ekki allar að veruleika. Það er þó fyrst og fremst ljóðlist Einars sem lifir og er hann talinn meðal helstu ljóðskálda íslensku þjóðarinnar,“ eins og þar segir.
Höggmynd Ásmunds Sveinssonar (1893-1982) sýnir skáldið standandi við hörpu, tákn skáldskaparins. Í heild er verkið sex metrar að hæð og vildi Ásmundur sýna að Einar væri stór í öllu, hann gæti ekki hugsað smátt. Útgáfufélagið Bragi kostaði gerð myndarinnar og gaf borgarbúum árið 1964.
