Segir konur einfaldlega ekki fyndnar

Enn deila menn um ágæti Áramótaskaups Ríkissjónvarpsins, sem kallað hefur verið kvennaskaup vegna þess að Silja Hauksdóttir leikstýrði, Gagga Jónsdóttir framleiddi og eintómar konur skrifuðu handrit. Sitt sýnist hverjum en einn þeirra sem blandar sér með afgerandi hætti í þær umræður er Baldur Hermannsson ellilífeyrisþegi og fyrrverandi framhaldsskólakennari. Hann setur fram kenningu, á Facebook-vegg sínum, sem gengur í stórum dráttum út á það að konur séu einfaldlega ekkert fyndnar.

„Góður Guð gaf sér rúman tíma til þess að smíða konuna, hann gerði hana skemmtilega, fjöruga, glaðværa, gáskafulla, ljúfa og snarpa, fallega og aðlaðandi ... en hann gerði hana ekki fyndna. Hann sá nefnilega að maðurinn var bráðfyndinn og taldi því varhugavert að gera hana að keppinaut mannsins.

Þess vegna er konum fyrirmunað að skilja brandara og enn síður er þeim hent að segja brandara. Satt að segja er það algert kvalræði að hlusta á konu segja brandara ... þær skilja hann ekki, hafa enga tilfinningu fyrir taktinum og botna ekkert í lokahnykknum, sem sumir kalla punch-line,“ skrifar Baldur og heldur ótrauður áfram:

„Vilji menn því gersamlega mislukkað áramótaskaup er aðeins ein leið örugg: láttu konu leikstýra og láttu konur semja handritið. Til hamingju Magnús Geir: þetta heppnaðist hjá þér vinur.“

Svo mörg voru þau orð og ýmsir skoðanabræður Baldurs telja hann hitta naglann á höfuðið en til andsvara er þó Guðfinna Jóh. Guðmundsdóttir, borgarfulltrúi Framsóknarmanna, og segir: „Heyrðu, ekkert svona. Þú myndir grenja úr hlátri ef við Sveina [Sveinbjörg Birna Sveinbjörnsdóttir] myndum búa til næsta áramótaskaup.“

Baldur gefur sig ekki og en þá heldur Guðfinna því fram að þetta sé versti status hans á árinu: „Þú hefur ekki séð mig segja brandara ég get lofað þér því að þar sem ég hef verið veislustjóri og sagt brandara hefur salurinn legið í kasti, ég er fyndin. Þú mátt segja hvað sem er um mig en að segja að ég sé ekki fyndin þýðir stríð.“