Þúsundir myrtar með eiturgasi

Kúrdar í norðanverðu Írak minntust þess í gær að 27 ár voru liðin frá fjöldamorðunum í borginni Halabja. Allt að fimm þúsund manns létu þar lífið þegar liðsmenn Saddams Hussein gerðu árás með eiturvopnum á íbúa borgarinnar.

Þúsundir manna til viðbótar létu lífið á næstu árum af völdum margvíslegra veikinda sem stöfuðu af eiturefnunum.

Þetta gerðist á síðustu vikum stríðsins milli Íraks og Írans. Íranar og Kúrdar höfðu nýverið náð Halabja úr höndum liðsmanna Saddams, en árásin varð til þess að Saddam náði bænum aftur á sitt vald.