Þetta myndi aldrei gerast hjá reyndum dómara

Talsmaður Knattspyrnusambands Evrópu, UEFA, segir að þar á bæ hafi menn ekki áhyggjur af því að mistök eins og áttu sér stað í U-19 landsleik Noregs og Englands á dögunum muni endurtaka sig.

Eins og fjallað hefur verið um gerði dómari í leik liðanna þau mistök að láta ekki endurtaka vítaspyrnu sem England fékk í uppbótartíma leiksins. Skorað var úr spyrnunni en hún dæmd ógild eftir að leikmaður Englands hljóp of snemma inn í vítateiginn.

Í stað þess að láta endurtaka spyrnuna, eins og knattspyrnulög gera ráð fyrir, dæmdi dómarinn óbeina aukaspyrnu á enska liðið og þær norsku fögnuðu 2-1 sigri og þar með sæti í lokakeppni EM U-19 liða.

UEFA ákvað að láta endurtaka leikinn til að leiðrétta mistök dómarans. Englendingar skoruðu úr vítinu, leiknum lyktaði með 2-2 jafntefli og England komst á EM.

Sjá einnig: Þessi dómari var sendur heim með skömm - sjáið af hverju

„Þetta hefur ekki gerst áður og við teljum enga ástæðu til að ætla að reyndur dómari geti gert svona mistök,“ var haft eftir talsmanni UEFA í enskum fjölmiðlum.

„Á stórum leikjum er líka fjórði dómari sem hefur líka mikla reynslu og stundum eru líka fjórir aðstoðardómarar en ekki tveir. Það er erfitt að ímynda sér að allir þeir muni líta framhjá svo stórum þætti í knattspyrnulögunum.“

Reyndar var fjórði dómari á umræddum leik Englands og Noregs en sá virðist hafa verið jafn ókunnugur lögunum og dómari leiksins sem gerði mistökin.

„Þetta er bara spurning um reynslu. Í U-19 mótum eru margir dómaranna að stíga sjálfir sín fyrstu skref,“ sagði talsmaður UEFA.