Dæmdur fyrir íkveikju og tilraun til tryggingasvindls

Héraðsdómur Vestfjarða dæmdi á dögunum karlmann á þrítugsaldri í tólf mánaða fangelsi fyrir íkveikju og tilraun til tryggingasvindls. Fullnustu refsingarinnar skal frestað og fellur hún niður að tveimur árum liðnum haldi hann skilorð. Annar maður var sýknaður í málinu.

Atvik málsins sem hér um ræðir áttu sér stað á Patreksfirði fyrir fjórum árum upp á dag. Húsið sem um ræðir var mannlaust og hafði verið rafmagnslaust frá janúar 2002.

Maðurinn sem sýknaður var var þinglýstur eigandi hússins en sá sem sakfelldur var bar því við í yfirheyrslu hjá lögreglu að hann væri raunverulegur eigandi þess. Í upphafi var ætlunin að húsið upp svo það gæti orðið heimili fyrir fjölskyldu sína. Hann hafi hins vegar hvergi fengið fjármagn eða fyrirgreiðslu og því brugðið á það ráð að kveikja í því.

Sá sem sýknaður var keypti bensín á brúsa sem þeir helltu yfir hitablásara og gólf á annarri hæð hússins. Í blásaranum komu þeir fyrir rokeldspýtu og fengu þriðja mann til að stinga blásaranum í samband um nóttina.

Sjá einnig: Íkveikja á Patreksfirði - játningar liggja fyrir

Hinn sakfelldi bar því við fyrir dómi að ekki væri hægt að sakfella hann fyrir tryggingasvindl þar sem hann hefði aldrei reynt að svíkja fé úr tryggingafélaginu. Dómurinn tók þá málsvörn ekki gilda og benti á að hann hefði aldrei fengið tækifæri til þess þar sem grunur féll á hann í raun áður en slökknað var í glæðunum.

Sannað þótti að maðurinn hafi framkvæmt íkveikjuna með þeim ásetningi ða svíkja bætur úr tryggingafélagi sínu. Einnig þótti sannað að þinglýstur eigandi þess hafi vitað að bensín, það er hann keypti, ætti að nota til að kveikja í húsinu. Hins vegar þótti ekki sannað að hann vissi að til stæði að svíkja fé úr tryggingafélaginu. Var hann því sýknaður.

Hinn sakfelldi rauf með brotinu skilorð fyrir þjófnaðarbrot og þótti refsing hans hæfilega ákveðin tólf mánuðir. Sökum þess að tæp fjögur ár tók að rannsaka og reka málið, þó það hefði talist upplýst tveimur dögum eftir brunann, var dómurinn skilorðsbundinn.