Eldur kviknaði í Boeing-vél British Airways

Eldur kom upp í Boeing 777-200 flugvél British Airways þegar hún var við það að taka á loft í Las Vegas á leið sinni til Lundúna í gærkvöldi.

Þrettán manns voru fluttir á spítala með minniháttar meiðsl en allir 172 einstaklingarnir um borð voru látnir yfirgefa vélina í samræmi við neyðaráætlun. Flestir þeirra sem fluttir voru á sjúkrahús slösuðust við að renna sér niður uppblásna neyðarrennibraut úr vélinni.

Samkvæmt bandarískum flugmálayfirvöldum kviknaði eldurinn í vinstri hreyfli vélarinnar og stóð svartur reykjarmökkur upp af vélinni þar til búið var að slökkva eldinn.