Pistorius sleppt í næstu viku

Suður-afríska spretthlauparanum Oscar Pistorius verður sleppt úr fangelsi í næstu viku eftir að hafa setið af sér tíu mánuði af dómi sínum.

Pistorius var dæmdur í fimm ára fangelsi fyrir morð af gáleysi, en hann banaði unnustu sinni, Reevu Steenkamp, á heimili þeirra í Pretoríu í febrúar 2013.

Í frétt Independent segir Pistorius hafi ekki sótt um að fá lausn úr fangelsinu sjálfur, heldur hafi nefnd sem tekur ákvarðanir um reynslulausnir fanga mælt með því að Pistorius fái reynslulausn við fyrsta tækifæri.

Í júní síðastliðinn greindu fulltrúar suður-afrískra fangelsisyfirvalda frá því að Pistoius myndi sitja af sér einn sjötta af fimm ára dómi sínum hið minnsta. Var tekið fram að Pistorius hafi hegðað sér vel innan veggja Kgosi Mampuru II fangelsisins í Pretoríu.